فراکسیۆنی یەکێتی: لێکۆڵینەوە لەو کەسانە دەکرێت کە ئاڵای کوردستانیان لە چەند گەنجێک وەرگرت

SNN

سۆزان مەنسور، وتەبێژی فراکسیۆنی یەکێتی لە ئەنجومەنی نوێنەرانی عێراق رایگەیاند: داوامان لە وەزارەتی ناوخۆ کردووە لێکۆڵینەوە بکەن لەو کەسانەی کە لە یاری کۆتایی پاڵەوانێتی کەنداو 25 ئاڵای کوردستانیان لە چەند گەنجێک وەرگرت و رێگەیان نەدا بەرزی بکەنەوە.

چەند رۆژێکە گرتەیەکی ڤیدیۆیی بڵاوبووەتەوە کە تێیدا دوو کەس بە جل و بەرگی رەسمی و وەک کارمەندی پاراستنی ئاسایشی یاریگاکە دەردەکەون، ئاڵای کوردستان لە چەند گەنجێک وەردەگرن، ئەم ڤیدیۆیە کاردانەوەی لێکەوتووەتەوە.

سۆزان مەنسور وتی، “بۆ دواداچوونی ئەم گرتە ڤیدیۆیە پەیوەندیمان کرد بە نوسینگەی وەزیری ناوخۆ و داوامان لێکردن کە لێکۆلینەوە بکەن لەو کەسەی کە بە جل و بەرگی رەسمی و وەک ئاسایشی یاریگاکە دەردەکەوێ، لێپێچینەوەی یاسایی لەگەڵدا بکرێ.”

دەشڵێت، بەپێ دەستوور ئاڵای کوردستان وەک ئاڵای هەرێمیکی فیدرالی لە چوارچێوەی عێراقدا، ئاڵایەکی رەسمیە و لەهیچ شوێنێکیش نابێ رێگیری لە بەرزکردنەوەی بکرێ.

راشیگەیاند، “لەلای خۆیانەوە نوسینگەی وەزیری ناوخۆ بەڵێنیان لێکۆلینەوە بکەن و لەئەنجامەکەی ئاگادارمان بکەنەوە.”