ناتۆ خۆی بۆ رووبەڕووبوونەوەی درێژخایەن لەگەڵ رووسیا ئامادە دەکات
SNN
هەرچەندە لە ماوەی شەڕی نێوان رووسیا و ئۆکرانیا ناتۆ راستەوخۆ بەشداری لەو شەڕەدا نەکردووە و تەنیا پشتیوانی سەربازی لە کیێڤ دەکات، بەڵام سکرتێری گشتیی ناتۆ باس لەوە دەکات خۆیان بۆ رووبەڕووبوونەوەی درێژخایەن لەگەڵ مۆسکۆ ئامادە دەکەن.
یانس ستۆڵتینبێرگ سکرتێری گشتیی ناتۆ رایگەیاند: لە دوای کۆتاییهاتنی شەڕی دووەمی جیهانییەوە هێرشی رووسیا بۆ سەر ئۆکرانیا مەترسیدارترین پێشهاتی ئەمنییە بۆ ئەوروپا.
باسی لەوەشکرد، رووسیا دەیەوێت وڵاتانی ئەوروپی دراوسێی ملکەچی سیاسەتەکانی وڵاتەکەی بکات و بەم جۆرە هەژموونی خۆی بەسەر ئەوروپادا بسەپێنێت.
ستۆڵتینبێرگ ئەوەشی خستەڕوو لە ناتۆ خۆی بۆ رووبەڕووبوونەوەی دریژخایەن لەگەڵ رووسیا ئامادەکردووە و بەرەنگاری هەوڵە فراوانخوازییەکانی مۆسکۆ دەبێتەوە.
دوای ئەوەی لە شوباتی ساڵی رابردوودا رووسیا هێرشەکانی بۆسەر ئۆکرانیا دەستپێکرد، ناتۆ ناڕاستەوخۆ و لە رێگەی پشتیوانی تەواوەتی لە کیێڤ بەشدار بووە لەو شەڕەدا.
