لە دوو رووداوی هاتووچۆدا لە ڕاپەڕین 6 کەس بوونە قوربانی

SNN- محەمەد مستەفا

ئەمڕۆ سێشەممە، لە سێیەم رۆژی جەژندا، لە سنووری ئیدارەی ڕاپەڕین بەهۆی دوو رووداوی هاتووچۆوه‌ کەسێک گیانی لە دەستدا و پێنج کەسی تریش بریندار بوون.

خۆشناو حەسەن، وتەبێژی پۆلیسی هاتووچۆی ڕاپەڕین بە (SNN)ی راگەیاند : “ئەمڕۆ دوو رووداوی هاتووچۆ یەکێکیان لە جۆری وەرگەڕان و ئەویتریشیان لە جۆری خۆپێداکێشان لە دەربەندی ڕانیە و لۆفەکانی زینی وەرتێ لە سنووری ئیدارەی ڕاپەڕین روویانداوە”.

وتیشی: “لە سنووری زینی وەرتێ ئۆتۆمبێلێکی بارهەڵگری بچووک وەرگەڕاوە و شۆفێری ئۆتۆمبێلەکە گیانی لە دەستداوە سێ سەرنشینیش بریندار بوون کە سەرجەمیان ئەندامی یەک خێزانن”.

وتەبێژی پۆلیسی هاتووچۆی ڕاپەڕین باسی لەوەشکرد: “لە رووداوێکی تردا لە دەربەندی ڕانیە ئۆتۆمبێلێکی جۆری قەمەرە خۆی کێشاوە بە راگری رێگاکەدا و شۆفێر و سەرنشینەکەی بریندار بوون”.