قوباد تاڵەبانی و سەرۆکی بولگاریا کۆبونەوە
قوباد تاڵەبانی، جێگرى سهرۆكى حكومهتى ههرێم | فۆتۆ: Azhi Omar
SNN
جێگری سهرۆكى حكومهتى ههرێمى كوردستان لە چوارچێوەی چالاکییەکانی کۆڕبەندی ئابوری دێڵفیدا، ئەمڕۆ هەینی 28ی نیسان، لەگەڵ ڕومێن ڕادێڤ، سەرۆکی بولگاریا کۆبوویەوە و پێکەوە باسی پەیوەندییەکان و دواپێشهاتە سیاسی و ئابورییەکانیان کرد.
لەمیانی کۆبوونەوەکەدا، قوباد تاڵەبانی و سەرۆکی بولگاریا جەختیان لە گرنگی باشترکردن و رێکخستنەوەی پەیوەندیەکانی هەرێمی کوردستان و بولگاریا کردەوە.
لەبارەی باشترکردنی شێوازی حوکمڕانی، قوباد تاڵەبانی ئاماژەی بەوەكرد، “بۆ پێشخستنی هەرێمی کوردستان پێویستمان بەسود وەرگرتنە لە ئەزمونی پێشکەوتووی وڵاتانی دەرەوە بۆ ئەوەی حکومڕانییەکی باشتر و دروستمان هەبێت لەپێناو خزمەتکردنی هاوڵاتیان”.
لەبارەی ئیدارەدانی سەرچاوە سروشتییەکانەوە، جێگری سهرۆكى حكومهت وتیشى: “ئێمە لەگەڵ باشتر بەڕێوەبردنی سەرچاوە سروشتیەکانین بەشێوازێک ببێتە مایەی خێر بۆ هەموو پێکهاتەکانی عێراق و هەرێم بێ جیاوازی، هەر بۆیەش دەبێت سەرەتا پێداویستی ناوخۆ دابینبکەین، دواتر بیر لە هەناردەکردن بۆ دەرەوەی هەرێم بکەینەوە،”.
قوباد تاڵهبانى جەختیشی لهسهر ئهوه کردەوە، “پێویستە تەنها پشت بە نەوت نەبەستین وەک تاکە سەرچاوەی داهاتی دارایی، بەڵکو دەبێت سود لە سێکتەرەکانی تری وەک کشتوکاڵ و گەشتوگوزار و پیشەسازی و کەرتی تایبەت بە گشتی وەربگرین و پەرەیان پێبدەین”.
ماوهى چهند رۆژێكه قوباد تاڵهبانى، جێگرى سهرۆكى حكومهتى ههرێم بهمهبهستى بهشدارى كردن له كۆڕبهندى ئابوورى دێڵفى سهردانى وڵاتى یۆنانى كردووه.
