باربارا لیف: ویستێکی راستەقینە ھەیە لەنێوان عێراق و ھەرێمی کوردستان بۆ چارەسەرکردنی کێشەکان

‏SNN
یاریدەدەری وەزارەتی دەرەوەی ئەمریکا رایگەیاند: ویستێکی راستەقینە ھەیە لەنێوان عێراق و ھەرێمی کوردستان بۆ چارەسەرکردنی کێشە ھەڵپەسێردراوەکانی نێوانیان.

باربارا لیف یاریدەدەری وەزارەتی دەرەوەی ئەمریکا لە چاوپێکەوتنێکدا ئاماژەی بەوەکردووە: کاری لەپێشینەی واشنتۆن و بەغداد لەیەکەوە نزیکە، ھەردوو وڵاتیش پەیوەندییەکانیان لە بوارەکانی دیکەی وەک پەروەردە و رۆشنبیری و ئاو و گۆڕانکاری کەشوھەوا و ئاسایشی خۆراک، پەرەپێدەدەن، نەک تەنھا لە رووبەڕووبوونەوەی تیرۆردا.

یاریدەدەری وەزارەتی دەرەوەی ئەمریکا وتیشی، پەیوەندییەکان لەگەڵ عێراق زۆر پێشکەوتووە، لەپێناو ئاسایش و سەقامگیری و سەروەری.

سەبارەت بە پەیوەندییەکانی نێوان عێراق و ھەرێمی کوردستانیش، ئەو لێپرسراوە ئەمریکییە دەڵێت، ویستی راستەقینە ھەیە بۆ ھەماھەنگی لەنێوان عێراق و ھەرێم، ھەستێکی ئەرێنیش ھەیە بۆ دۆزینەوەی چارەسەر بۆ کێشە ھەڵپەسێردراوەکان، وەک یاسای نەوت و چارەسەر بۆ پڕۆژەیاسای بودجە.