وادەی دەستپێکردنەوەی گەشتە ئاسمانییەکانی سلێمانی لەگەڵ تورکیا راگەیەندرا

SNN

پارێزگاری سلێمانی رایگەیاند: وادەی راگرتنی گەشتەئاسمانییەکانی نێوان سلێمانی و تورکیا تا 10ی 7 درێژکراوەتەوە و ئومێدەوارین دوای ئەو وادەیە دەستپێبکاتەوە.

ئەمڕۆ چوارشەممە، هەڤاڵ ئەبوبەکر، پارێزگاری سلێمانی لە کۆنفرانسێکی رۆژنامەنوسیدا دەربارەی هەوڵەکان بۆ ئاساییکردنەوەی گەشتەکان لە تورکیاوە بۆ سلێمانی ڕایگەیاند: هەنگاوەکان بەردەوامن و ئومێدمان زۆرە لە مانگی حەوتدا بگەینە ئەنجامێك ئاسمانی تورکیا بەڕووی گەشتەکان بۆ سلێمانی بکرێتەوە و گەشتەکانی هێڵی ئاسمانیی تورکش ئێرڵاین بۆ فڕۆکەخانەی سلێمانی دەستپێبکەنەوە.
وتیشی: “هەموولایەك ئارامی شارەکە دەبینن و دڵنیان لەوەی فڕۆکەخانەی سلێمانی فڕۆکەخانەیەکی مەدەنییە”.

پارێزگاری سلێمانی ڕاشیگەیاند، وادەی ڕاگرتنی گەشتەکان بۆ سلێمانی تا 10ی مانگی تەموز درێژکراوەتەوە، بەڵام ئومێدەوارین دوای ئەوە بگەینە ئەنجامێك ئەو گرفتە چارەسەر بێت.