قافڵەیەکی سوپای تورکیا لە ئیدلب کرایە ئامانج و کوژراو و بریندار هەیە

SNN-

ئاژانسی هەواڵی رۆیتەرز بڵاویکردەوە: ئەمڕۆ چوارشەممە 27ی ئایار لەسەر رێگەی ئێم 4 کە رێگەیەکی خێرایە، قافڵەیەکی هێزەکانی سوپای تورکیا کراوەتە ئامانج.

ئاژانسەکە بڵاویکردۆتەوە: کە بۆمبێکی چێنراو لەسەر رێگەی پەڕینەوەی ئەو هێزە لەشاری ئیدلیب-ی سوریا دانراوە و بەپێی ئاماری سەرەتایی کوژراو و برینداریش هەیە.

ئاژانسی هەواڵی دیمترۆرینی تورکیش رایگەیاندووە “سەربازێک و ئەفسەرێکی هێزەکەی تورک پێوەبوون و دەنگۆی کوژرانی سەربازەکە هەیە”.

روانگەی سوریش بۆ مافەکانی مرۆڤ دەڵێت: “تەقینەوەکە بەهێز بووە و ناوچەی رێگای سەرەکی نێوان حەلەب لازقییەی کردۆتە ئامانج لەلای غەسانییەی سەر بە ریفی جسر شغور”.

بریندارەکانیش بە کۆپتەر گواستراونەتەوە بۆ نەخۆشخانەیەکی سەربازی لەنزیک شاری ئیدلب بۆ وەرگرتنی چارەسەر.