بافڵ جەلال تاڵەبانی و محەمەد حەلبوسی کۆبوونەوە

SNN

بافڵ جەلال تاڵەبانی، سەرۆکی یەکێتیی نیشتمانیی کوردستان و محەمەد حەلبوسی، سەرۆکی ئەنجوومەنی نوێنەرانی عیراق کۆبوونەوە.

لە کۆبوونەوەکەدا کە رەفعەت عەبدوڵا، بڕیاردەری دەستەی کارگێڕی و دەرباز کۆسرەت رەسوڵ، کارگێڕی مەکتەبی سیاسی و سەعدی ئەحمەد پیرە، ئەندامی مەکتەبی سیاسی ئامادەبوون، دۆخی گشتیی وڵات و ئەرکەکانی پەرلەمان لەم قۆناغەدا گفتوگۆی لەبارەوەکرا و جەخت لە لێکتێگەیشتنی نێوان لایەنەکان کرایەوە بەتایبەت بۆ تێپەڕاندنی ئەو یاسایانەی رەهەندی نیشتمانیان هەیە و خزمەت بە بەرژەوەندییە گشتییەکان دەکەن.

سەرۆک بافڵ جەلال تاڵەبانی هەوڵ و پەرۆشیی یەکێتی بۆ کۆدەنگیی لایەنەکان و چڕکردنەوەی هەوڵەکان لەپێناو چارەسەرکردنی کێشەکان و گەیشتن بە ئەنجامێکی ئەرێنی دووپاتکردەوە و رایگەیاند، گەڕانەوە بۆ دەستوور و هاوبەشیی راستەقینە، فاکتەری سەرەکی سەقامگیریی وڵاتە. پێویستە هەموومان هەوڵ بۆ تێپەڕاندنی بەربەستەکان بدەین و بە ئاڕاستەی جێبەجێکردنی رێککەوتنە سیاسییەکان هەنگاوبنێین.