ساڵانە هەرێمی کوردستان پێویستی بە 12هەزار تۆن ماسییە
عەلی حەمەسەعید-SNN
سەرۆکی کۆمەڵەی پەرەپێدانی سامانی ماسی لەهەرێمی کوردستان ئاماژەبەوەدەکات، لە پارێزگاکانی هەرێمی کوردستان چوار هەزار حەوزی کشتوکاڵی ئاوی هەیە کە ساڵانە هەشت هەزار تۆن ماسی بەرهەم دەهێنن، بەڵام هەرێمی کوردستان ساڵانە پێویستی بەبەرهەمهێنانی 12هەزار تۆن ماسی دەبێت بۆ ئەوەی ماسی لەدەرەوە هاوردە نەکات.
سەڵاح مەجید، سەرۆکی کۆمەڵەی پەرەپێدانی سامانی ماسی لە هەرێمی کوردستان بە SNNی ڕایگەیاند: لە ئێستادا لە پارێزگاکانی هەرێم چوار هەزار حەوزی ماسی بوونیان هەیە لەو ژمارەیەش تەنها 412 حەوزی ماسی مۆڵەتیان هەیە، ئەگەر پەرە بە سامانی ماسی بدرێت، دەتوانرێت هەناردە بکرێت و ئاستی خۆبژێوی تێپەڕێنێت.
ئاماژەی بەوەشکرد،لە پارێزگاکانی هەرێمی کوردستان ساڵانە نزیکەی هەشت هەزار تۆن ماسی بەرهەم دەهێندرێت بەڵام پێداویستی دانیشتووانی هەرێم لەساڵێکدا زیاتر لە 12 هەزار تۆن ماسییە هەیە بۆ ئەوەی بگەینە خۆبژێوی وپێویست بە بەرهەمی دەرەوە نەکات.
سەرۆکێ کۆمەڵەی پەرەپێدانی سامانی ماسی لەهەرێمی کوردستان ئەوەشی خستەڕوو، زیادبوونی خواست لەسەر ماسی لەهەرێمی کوردستان وایکرد بازرگانان حەوزی نوێ دابمەزرێنن بۆیە زۆر گرنگە بازاڕ بۆ بەرهەمی ناوخۆیی ماسی بدۆزرێتەوە، هەروەها خولی کراوە بۆ پەرەپێدانی کارامەیی لە مامەڵەکردن لەگەڵ ماسی بۆ خاوەن حەوزەکانی بەخێوکردنی ماسی بکرێتەوە.
