مامۆستایانی ناڕازی: بەیەک مووچە بایکۆت ناشکێنین

دەستەی مامۆستایانی نارازی هۆشداری دەدەنە حکومەتی هەرێمی کوردستان و دەڵێن:” بە وەرگرتنی یەک مووچە بایکۆت ناشکێنن و ناچنەوە هۆڵەکانی خوێندن”.

ئەمڕۆ چوارشەممە 20ی ئەیلول، دەستەی داکۆکی لە مامۆستایان و فەرمانبەرانی ناڕازی رایانگەیاندووە، بەردەوام دەبن لە بایکۆت و ناچنەوە هۆڵەکانی خوێندن، بە وەرگرتنی یەک مووچەش بایکۆت ناشکێنن.

لە پەیامەکەیاندا مامۆستایانی ناڕازی ئاماژەیان بەوەکردووە، لەگەڵ وەرگرتنی یەک مووچەدا بۆ رۆژی دواتر لە بەردەم پەروەردەی سەرجەم شارەکان خۆپیشاندان ساز دەکەن، و وەرگرتنی مووچەکانی مانگی تەمموز و ئاب بەیەکەوە و دابەشکردنی هەر مووچەیەک لە وادەی خۆیدا زامنی کردنەوەی دەرگای خوێندنگەکان دەکات”.

داواکاری پەیامی دەستەی داکۆکی لەمامۆستایان و فەرمانبەران:
1- بە وەرگرتنی یەک مووچە بایکۆت ناشکێنین و بەردەوامین لەبایکۆتکردنی هۆڵەکانی خوێندن.
2- لەگەل وەرگرتنی موچەیەک رۆژی دواتر لەبەردەم پەروەردەی سەرجەم شارەکان خۆپیشاندان ساز دەکەین.
3- وەرگرتنی موچەی مانگی 7 و 8 پێکەوە، لەگەڵ دابەشکردنی هەرمووچەیەک لەکاتی خۆیدا زامنی کردنەوەی دەرگای قوتابخانەکانە.