” چارەسەركردنی کێشە داراییەکانی نێوان هەولێر و بەغدا پێویستی بە ڕێككەوتنی سیاسی هەیە”

SNN-عەلی حەمەسەعید

ئەندامێكی ئەنجومەنی نوێنەرانی عێراق لە فراكسیۆنی یەكێتی ئاماژە بەوەدەكات، كێشە دارایی و ئابوورییەكانی نێوان هەرێم و بەغدا لە بنەڕەتدا پەیوەستن بە كێشەی سیاسی و پێویستە سەرەتا رێككەوتنی سیاسی بكرێت و پاشان بەڕێگەی تەكنیكی كێشەكان چارەسەر بكرێن.

كاروان یاروەیس، ئەندامی ئەنجومەنی نوێنەرانی عێراق لە فراكسیۆنی یەكێتی بە SNN-ی رایگەیاند، ئەو كێشانەی لە نێوان هەرێم و بەغدا هەیە تەنها لە دیوی دەرەوەیدا وەكو كێشەی دارایی و ئابووری دەردەكەون، بەڵام لە ناوەڕۆكدا كێشەی سیاسین و پێویستە بە رێككەوتنی سیاسی چارەسەر بكرێن

ئاماژەی بەوەشكرد، حكومەتی عێراق دەیەوێت لە رێگەی هەژماری بانكێكی حكومییەوە موچەی فەمانبەرانی هەرێم دابەش بكات، و شاندی هەرێم دەڵێن لێكتێگەشتن لەگەڵ حكومەتی ناوەند هەی، بەڵام تا ئێستا كێشەكانی نێوانیان بەردەوامە و كار لەسەر چارەسەركردنی ریشەیی نەكراوە، لەگەڵ ئەوەشدا تەواوی هەوڵەكان بۆ ئەوەیە پرسی موچە لە ناكۆكییە سیاسی و داراییەكانی نێوان هەرێم و بەغدا جیابكرێتەوە.

وتەكانی ئەو پەرلەمانتارە لەكاتێكدایە، دەبوو لەناوەڕاستی ئەم هەفتەیە دووەم بڕی 700 ملیار دینار بگاتە هەرێمی كوردستان و دەستبكرایە بە دابەشكردنی مووچەی مانگی هەشت، بەڵام تائێستا دیارنییە كەی ئەو بڕەپارەیە دەگات و مووچەی مانگی هەشت دابەشدەكرێت.