بەغدا بڕی 450 ملیار دیناری خستە سەر هەژماری بانکی هەرێمی کوردستان

SNN-

کەمێک لەمەوبەر بەغدا بڕی 450 ملیار دیناری لە رێگەی بانکی رەشید و تی بی ئایەوە خستە سەر هەژماری بانکی هەرێمی کوردستان و بڕیاریشە رۆژی یەکشەممەی داهاتوو لە رێگەی بانکی رافیدەینەوە 250 ملیار دیناری دیکە بۆ هەرێمی کوردستان بنێردرێت.

بڕی پارەکە 250 ملیاری دیناری لە رێگەی بانکی رەشید و 200 ملیار دیناریش لە رێگەی بانکی تی بی ئایەوە خراوەتە سەر هەژماری بانکی هەرێمی کوردستان.

بەغدا بڕیاریداوە بۆ ماوەی سێ مانگ 700 ملیار دینار بۆ مووچەی فەرمانبەرانی هەرێمی کوردستان بنێرێت، ئەمە دووەم 700 ملیار دینارە و هەرێمی کوردستانیش بۆ دابەشکردنی مووجەی مانگی 8 چاوەڕێی ناردنی ئەو 700 ملیار دینارە دەکات، ئەگەر نا خۆی ناتوانێت بێ پارەی بەغدا و بە تەنها بە داهاتی ناوخۆ مووچە دابەشبکات.

شەوی رابردوو، ئومێد سەباح سەرۆکی دیوانی ئەنجوومەنی وەزیرانی هەرێم لە کۆنگرەیەکی رۆژنامەنوسیدا رایگەیاند، سبەینێ بەشێکی پارەکەی بەغدا دەگاتە هەرێم و رۆژی یەکشەممەش بەشەکەی دیکە دەگات و هەفتەی داهاتووش دەست بە دابەشکردنی مووچە دەکرێت.