چوارچێوەی هەماهەنگی رازین بە کۆتاییھێنان بە ئەندامێتی محەمەد حەلبوسی

SNN

 چوارچێوەی ھەماھەنگی شیعەکان دوای کۆبوونەوەیان لەگەڵ محەمەد شیاع سودانی رایانگەیاند، پابەندن بە بڕیارەکانی دادگای فیدراڵی و رەتیشی دەکەنەوە هیچ شتێک ناوبانگی دادگای عێراقی لەکەدار بکات.

دوای کۆبوونەوەی چوارچێوەی ھەماھەنگی لە ماڵی محەمەد شیاع سودانی، سەرۆکوەزیرانی عێراق، راگەیەنراوێکیان بڵاوکردەوە و ئاشکرایانکرد، رێز لە دەسەڵاتی دادوەریی دەگرن و پابەندن بە بڕیارەکانی دادگای فیدراڵیی سەبارەت بە کۆتاییھێنان بە ئەندامێتی محەمەد حەلبوسی لە ئەنجومەنی نوێنەرانی عێراق.

ئاماژە بەوەدەکەن، رەتیدەکەنەوە ھیچ شتێک ناوبانگی دادگای عێراقی و سەربەخۆیی و بێلایەنییەکەی لەکەدار بکات، جەختیش لە تەواوکردنی پێداویستییەکان بۆ ھەڵبژاردنی ئەنجومەنی پارێزگاکان دەکەنەوە، کە بڕیارە مانگی داھاتوو ئەنجام بدرێت.

کۆبوونەوەکەی چوارچێوەی ھەماھەنگی لەگەڵ سەرۆکوەزیرانی عێراق، کۆبوونەوەیەکی بەپەلە بوو لەدوای دوورخستنەوەی محەمەد حەلبوسی ئەنجامدرا، بۆ تاوتوێکردنی پێشھاتە سیاسییەکان و رەوشی عەززە.