سەرۆكی لیستی هاوپەیمانی خەڵكی نەینەوا: هاوپەیمانیەكەمان گوزارشت لەهەموو پێكهاتە جیاوازەكانی نەینەوا دەكات

SNN-عەلی حەمە سەعید

سەرۆکی لیستی هاوپەیمانی یەكێتی خەڵكی نەینەوا ئاماژە بەوەدەكات ئاوەدانكردنەوە و بوژانەوەی ژێرخانی كارگێڕی و ئاسایشی سنووری نەینەوا، كاری لەپێشینەی لیستەكەیان دەبێت چونكە هاوپەیمانیەكەمان گوزارشت لەھەموو پێكھاتە و نەتەوە جیاوازەكانی نەینەوا دەكات بەبێ جیاوازی، خزمەتكردنی شاری نەینەوا بە ئەركی خۆمان دەزانین.

ئاراس محەمەد ئاغا، ئەندامی سەركردایەتی یەكێتی و سەرۆكی هاوپەیمانی یەكێتی خەلكی نەینەوا، بە SNNی ڕاگەیاند: هاوپەیمانیەكەمان گوزارشت لەھەموو پێكھاتە و نەتەوە جیاوازەكانی نەینەوا دەكات بەبێ جیاوازی، خزمەتكردنی شاری نەینەوا بە ئەركی خۆمان دەزانین، هاوكات هەمیشە جەخت لە گەڕاندنەوەی ئاوارەكان دەكەینەوە بۆ سەر زێدی خۆیان و هەوڵەكانیشمان بۆ ئەو پرسە چڕ دەینەوە.

ئاماژەی بەوەشكرد، ئاوەدانكردنەوە و بوژانەوەی ژێرخانی كارگێڕی و ئاسایشی ئەو سنوورە، كاری لەپێشینەی لیستەكەیان دەبێت، لەگەڵ ئەوەشدا هاوپەیمانی یەكێتی خەڵكی نەینەوا پشتگیری تەواوی پێكھاتەكانی دەشتی نەینەوا دەكات بەبێ جیاوازی بۆیەش كاندیدەكانی پێكدێت لە هەموو پێكهاتە و ئاین و نەتەوە جیاوازەكانی شارەكە.

سەرۆكی لیستی هاوپەیمانی یەكێتی خەڵكی نەینەوا ئەوەشی خستەڕوو، پێویستە پۆست و یەكە كارگێڕییەكان و حكومەتی خۆجێی نەینەوا و قەزا و ناحیەكانی ئەو سنوورە بە یەكسانی و دیموكراسیانە دابەش بكرێت نەك بۆ یەك دوو لایەن قۆرخ بكرێت، بۆیە دەبێت بەهەمووان هەوڵی سەرخستنی لیستی هاوپەیمانیی یەكێتی خەلكی نەینەوا و كاندیدەكانی بدەین.