ڕێگە بە وەزیری ناوخۆی عێراق نەدرا دەنگ بدات

SNN

کارمەندانی کۆمسیۆنی باڵای سەربەخۆی هەڵبژاردنەکان ڕێیان بە وەزیری ناوخۆی عێراق نەدا لە هەڵبژاردنی ئەنجومەنی پارێزگاکاندا دەنگ بدات.

ئەمڕۆ دووشەممە، عەبدولئەمیر شممەری وەزیری ناوخۆی عێراق بەمەبەستی بەشداریکردن لە هەڵبژاردنی ئەنجومەنی پارێزگاکان، ڕووی لە هۆتێل ڕەشیدی بەغدا کرد کە تایبەت کراوە بە دەنگدانی کەسایەتییە سیاسی و حکومییەکان.

ماڵپەڕە عێراقییەکان بڵاویانکردەوە کە کارمەندانی کۆمسیۆن ڕێیان بە وەزیری ناوخۆ نەداوە دەنگ بدات، ئەویش بەو پێیەی دەبوو ڕۆژی شەممە لە دەنگدانی تایبەتی هێزە ئەمنییەکاندا دەنگی بدایە.

لە بەیانی ئەمڕۆوە دەنگدانی گشتی بۆ هەڵبژاردنی ئەنجومەنی پارێزگاکانی عێراق دەستیپێکردووە و بڕیارە تا کاتژمێر 6ی ئێوارە بەردەوام بێت.