سوودانی هۆکاری دواکەوتنی دەستپێکردنەوەی هەناردەی نەوتی هەرێم ئاشکرا دەکات
SNN
سەرۆکوەزیرانی عێراق هۆکاری دواکەوتنی دەستپێکردنەوەی هەناردەی نەوتی هەرێمی کوردستان ئاشکرا دەکات، باسە لەوەشکرد لە رێگەی هەموارکردنەوەی یاسای بودجە هەوڵ دەدەن ئەو کێشەیە چارەسەر بکەن.
محەممەد شیاع سوودانی، سەرۆکوەزیرانی عێراق بە ئاژانسی بلومبێرگی ئەمریکی راگەیاندووە، ناکۆکییەکان لەگەڵ کۆمپانیا نێودەوڵەتییەکان کە لە کەرتی نەوتی هەرێمی کوردستان کار دەکەن، لەسەر خەرجکردنی پارەکانیان، هۆکاری دواکەوتنی دەستپێکردنەوەی هەناردەکردنی نەوتی هەرێمی کوردستانە.
راشیگەیاند: “کۆمپانیاکانی نەوت، پرسێکیان هەیە لەگەڵ خەرجیی بەرهەمهێنانی نەوتەکە، گفتوگۆکان بەردەوامن بۆ چارەسەرکردنی ئەو کێشانە، بەڵام هێشتا نەگەیشتوونەتە رێککەوتنێکی فەرمی.”
سەرۆکوەزیرانی عێراق باسی لەوەشکرد، لە مانگی رابردووەوە لەنێو ئەنجوومەنی وەزیرانی عێراق سەرقاڵی هەڵسەنگاندنێکن بۆ گۆڕانکاری و هەموارکردنەوە لە بودجەی عێراق، تاوەکو لە رێگەی گۆڕانکارییەکانەوە بتوانن پارەی کۆمپانیا بیانییەکان بدەن.
رۆژی 25ی ئاداری 2023، لە ئەنجامی بڕیارێکی دادگای نێوبژیوانیی نێودەوڵەتی لە پاریس هەناردەکردنی نەوتی هەرێمی کوردستان راگیرا و تائێستا سەرجەم دانوستانەکان لەنێوان عێراق و تورکیا لە بارەی دەستپێکردنەوەی هەناردەی نەوتی هەرێم، بێ ئەنجامبوون.
