شارەوانی رانیە: ئەو کەسەی ئاگری لەناو بلوارەکاندا کردووەتەوە دەبێت قەرەبووی زیانەکان بکاتەوە
SNN
سەرۆکی شارەوانی رانیە رایگەیاند، ئەو کەسەی لەناو بلواری شاری رانییەدا ئاگری کردەوە و زیانی بە دوو دار گەیاند، قەرەبووی زیانەکان دەکاتەوە.
بەرهەم رەسوڵ، سەرۆکی شارەوانی رانیە ئاشکرایکردووە، رۆژی سێشەممەی رابردوو کەسێک لە ناو بلواری بازاڕی رانیەدا لە نێوان دوو داردا ئاگریکردبووەوە و زیانی بە دوو دارەکە گەیاندبوو، بەو هۆیەوە ئەو کەسە بانگی شارەوانی رانیە کراوە.
ئاماژەی بەوەکردووە، ئەو کەسە دوای بانگکردنی ئامادەیی دەربڕیوە قەرەبووی زیانەکان بکاتەوە، ئەویش بە کڕینی چەند دارێک و روواندنەوەی لە هەمان ئەو شوێنەی ئاگرەکەی تێدا کردووەتەوە.
ئەوەشیخستووەتە ڕوو، ئیجرائات و قسەکردنیان لەگەڵ ئەو کەسەدا کە ئاگرەکەی کردووەتەوە بۆ ئەوە بوو تا ئەو هەڵسوکەوتە و زیانگەیاندن بە دار لە هەرشوێنێک بێت نەبێت بە دیاردە و خەڵکی دیکەش هەمان کار نەکەنەوە.
