ئازاد تۆفیق: ساڵی داهاتوو دەبێت هەڵەبجە ببێت بە پارێزگا

پارێزگاری هەڵەبجە لە 36-مین ساڵیادی کیمیابارنکردنی شارەکەدا رایگەیاند، ساڵی داهاتوو دەبێت هەڵەبجە پارێزگا بێت و شەرمەزارم ئەگەر لە 37هەمین ساڵیادی کیمیابارانیدا، هەڵەبجە پارێزگا نەبێت.

ئازاد تۆفیق، پارێزگاری هەڵەبجە لە وتارێکدا لە ساڵیادی کیمیابارانی هەڵەبجەدا ڕایگەیاند، پێویستە حکومەتی عێراق گرنگی زیاتر بە هەڵەبجە بدات و ئەو ڕاستییە بزانێت، خۆشیی و خەمەکانی هەرێمی کوردستان بەشێکە لە مێژووی عێراق، وەک چۆن دەبێت لا لە نەجەف و زۆنگاوەکان بکرێتەوە دەبێت، بە هەمان شێوە لا لە شارەزوور، هەڵەبجە و هەورامان بکرێتەوە و دەبێت حکومەتی عێراق بیسەلمێنێت لە زاخۆوە بۆ بەسڕە و لە ئاوێسەرەوە بۆ فاو جیاوازی نییە.

ئەمڕۆ 36 ساڵ بەسەر کیمیابارانکردنی شاری هەڵەبجەدا تێپەڕ دەبێت و تاوەکو ئێستاش هەڵەبجە بە فەرمی لە لایەن عێراقەوە نەکراوەتە پارێزگا.