عێراق بەبێ ناوهێنانی ئێران سەرکۆنەی هێرشە موشەکییەکانی سەر کوەیت دەکات

SNN-

وەزارەتی دەرەوەی عێراق لە بەیاننامەیەکی فەرمیدا، سەرکۆنەی کردنە ئامانجی خاکی کوێتی بە موشەک و فڕۆکەی بێفڕۆکەوان کرد، بەبێ ئەوەی بە شێوەیەکی ڕاستەوخۆ ناوی کۆماری ئیسلامی ئێران بهێنێت.

لە بەیاننامەکەدا هاتووە، بەغدا بە توندی سەرکۆنەی ئەو هێرشانە دەکات کە دەکرێنە سەر کوێت و جەخت لەسەر ڕەتکردنەوەی سەرجەم ئەو کارانە دەکاتەوە کە دەبنە هۆی هەڕەشەکردن لە ئاسایش و سەقامگیری وڵاتانی ناوچەکە. هاوکات وەزارەتەکە داوای دانبەخۆداگرتن و دوورکەوتنەوە لە هەڵکشانی زیاتری گرژییەکانی کردووە و ڕایگەیاندووە کە پێویستە پەنا بۆ گفتوگۆ و ڕێگەی دیپلۆماسی ببرێت بۆ چارەسەرکردنی قەیرانەکان.

ئەم هەڵوێستەی بەغدا دوای ئەوە دێت کە پێشتر وەزارەتی دەرەوەی کوەیت بە توندی سەرکۆنەی هێرشێکی موشەکی و درۆنی کرد کە لەلایەن ئێرانەوە کرابووە سەر وڵاتەکەی و بە پێشێلکردنی ئاشکرای سەروەری و هەڕەشەی ڕاستەوخۆ بۆ سەر خەڵکی مەدەنی و ژێرخانی وڵاتەکەی ناوبردبوو.

شایەنی باسە سوپای کوەیت لە چەند ڕۆژی ڕابردوودا ڕایگەیاند کە سیستمی بەرگری ئاسمانی وڵاتەکەیان توانیویەتی بەرپەرچی هێرشێکی موشەکی و درۆنی ئێرانی بداتەوە و داوای لە هاووڵاتییانی کرد پابەندی ڕێنماییە ئەمنییەکان بن.