وۆڵ ستریت جۆرناڵ: ئێران تەنها بۆ ماوەی 5 مانگی دیکە دەتوانێت بەرگەی گەمارۆ ئابوورییەکان بگرێت

SNN-

ڕۆژنامەی “وۆڵ ستریت جۆرناڵ”ی ئەمریکی لە ڕاپۆرتێکی شیکاریی نوێدا ئاشکرای کرد، هەڵسەنگاندنە ناوخۆیییەکانی سەرکردایەتیی کۆماری ئیسلامیی ئێران ئاماژە بەوە دەکەن کە وڵاتەکە لە ژێر ڕۆشنایی توندبوونەوەی گەمارۆ ئابوورییەکان و پەرەسەندنی ململانێی سەربازی لەگەڵ ئەمریکادا، تەنها دەتوانێت بۆ ماوەی نزیکەی پێنج مانگی دیکە بەرگەی دۆخە سەختەکە بگرێت.

بەپێی زانیارییەکانی ڕۆژنامەکە، کە لە سەرچاوە هەواڵگرییەکان و لێکۆڵینەوەی ڕەوشی ناوخۆی ئێرانەوە دەستی کەوتوون، ئەم پێشبینییە کاتییە پەیوەستە بە لێکۆڵینەوە و لێکەوتە وێرانکەرەکانی ئەو گەمارۆ دەریایییە توندەی واشنتن بەسەر بەندەرەکانی ئێراندا سەپاندوویەتی لە چوارچێوەی هەڵمەتێکدا بە ناوی “ئۆپەراسیۆنی دابڕینی ئابووری”.

ئەم ڕێکارانە هەناردەکردنی نەوتی خاوی ئێرانیان بە ڕێژەی زیاتر لە 80% کەمکردووەتەوە و هێڵە دارایییە سەرەکییەکانی وڵاتەکەیان پچڕاندووە، بە جۆرێک پێشبینی دەکرێت لە ماوەی چەند مانگی داهاتوودا داهاتی نەوتی ئێران بۆ سفر داببەزێت ئەگەر دۆخەکە بەمشێوەیە بمێنێتەوە.

لە ڕاپۆرتەکەدا هاتووە کە هۆکاری سەرەکیی دیاریکردنی ئەم وادە پێنج مانگییە دەگەڕێتەوە بۆ تێکچوونی خێرای ئابووریی ناوخۆیی و قەیرانی نەختینە؛ بەهای دراوی نیشتمانی (تمەن) بە شێوەیەکی مێژوویی دابەزیوە، هەڵئاوسان گەیشتووەتە ئاستێکی مەترسیدار، و نرخی پێداویستییە سەرەکییەکان و ماددە خۆراکییەکان بە ڕێژەیەکی بەرچاو بەرز بوونەتەوە.

لە هەمان کاتدا، هەوڵەکانی واشنتن بۆ سەپاندنی سزا بەسەر ئەو بانك و دەزگا دارایییە نێودەوڵەتییانەی هاوکاریی تاران دەکەن (لە تورکیا، ئیمارات و چین)، وای کردووە ئێران تەنانەت نەتوانێت دەستی بە یەدەگی دراوی بیانیی خۆی لە دەرەوە بگات.

ڕۆژنامەکە ئاشکراشی کردووە، تاران سەرەڕای کۆنترۆڵکردنی ناوخۆیی لەلایەن باڵی توندڕەوی سەربازی و سوپای پاسدارانەوە، لە ڕووی لۆجستی و ئابوورییەوە ڕووبەڕووی دۆخێکی بنبەست بووەوە.