جهزا سهید مهجید: لهگهڵ گۆڕان لە هەوڵی زیندووکردنەوەی ڕێككهوتنامهى دهباشانداین
SNN-ههوراز ئهحمهد
لێپرسراوى مهڵبهندى یهكى سلێمانى یهكێتیى نیشتمانیى كوردستان رایدهگهیەنێت: “ئێمه له یهكێتى پابهندى ئهو ڕێككهوتنانهین كه لهگهڵ بزوتنهوهى گۆڕان كردومانن، لیژنهیهك له ههردوولا دروست کراوە لهسهر ئاڵوگۆڕى پۆستهكانى پارێزگاى سلێمانى و ههڵهبجه و ئیدارهكانى گهرمیان و ڕاپهڕین”.
جهزا سهید مهجید، لێپرسراوى مهڵبهندى یهكى سلێمانى یهكێتیى نیشتمانیى كوردستان به SNNی راگهیاند: “یهكێتى و گۆڕان دهستیان بهگفتوگۆ و دانوستان كردوه له ڕۆژانى ڕابردوو له سهر ئاستى باڵا كۆبوونهوه كراوه و لیژنهیهكیش له ههردوولا پێكهێنراوه به مهبهستى پێداچوونهوه و زیندوو كردنهوهی رێككهوتنامهكانى نێوان ههردوو حزب به ڕێككهوتننامهى دهباشانیشهوه”.
وتیشى: “تاوهكو ئێستا ناوى هیچ كاندیدێك یهكلا نهبووەتهوه بۆ وهرگرتنى پۆسته ئیدارییهكان و گفتوگۆكان درێژهى دهبێت، ئهوهشى كه ناوى ههندێك كهس دههێنرێت كه گوایه یهكلا بووبێتهوه بۆ وهرگرتنى پۆستهكان دووره له راستیهوه چونكه كاندید كاتێك دیارى دهكرێت كه مهڵبهند و مهكتهبهكان كۆبوونهوهى لهسهر بكەن و مهكتهبى سیاسى ههڵیبژێرێت، ناوهكان بهرز بكهنهوه بۆ هاوسهرۆكان و ئهوانیش ئاراستهى تیمى حكومهتى بكهن، ئهوهى ڕاستیه ئهوهیه تاوهكو ئێستا ئهم پرۆسهیه بهڕێوه نهچووه”.
