سوپای لیبیا: تورکیا 10 هەزار بەکرێگیراوی لەناو وڵات بڵاوەپێکردووە

SNN-

فەرمانگەی ناوەندی سەربازیی لیبیا رایدەگەیەنێت “تورکیا هەستاوە بەپڵاوەپێکردنی 10 هەزار بەکرێگیراوی خۆی لەسنووری شاری سەرت و نیازی تورکیا هێرشکردنە بۆ سەر شاری سەرت و جەفرە”.

عەمید خالد مەحجوب بەڕێوەبەری فەرمانگەی ناوەندی سەربازیی لیبیا بەئاژانسی سکای وتووە “بەوردیی چاودێری دۆخەکە و جوڵەی ئەو هێزانەی تورک دەکەین و هەر دوێنێش تورکەکان فڕۆکەی بێفڕۆکەوانیان ناردۆتە سەر ئاسمانی ناوچەکە تا لەپڕۆژەیەکی ئاودێریی بدەن”.

ئاماژەی بەوەشکرد “حکومەتی ویفاق لەهەموو پەیمانەکانی خۆی دەرچووە و ئێمەش بۆ پاراستنی ئاسایشی خۆمان مافی خۆمانە پشت بە تواناکانی میسر ببەستین”.

ئەم جموجۆڵانەی تورکیا لەکاتێکدایە دوێنێ هایکۆ ماس وەزیری دەرەوەی ئەڵمانیا وتی: “ئەو هەڵسوکەوتە نەشیاوانەی تورکیا لەڕووی هەرێمییەوە و لەلیبیا و ناوچەکەدا ئەنجامی دەدات، جێگەی قبووڵکردن نین”.

هاوکات ئەحمەد مسماریی وتەبێژی هێزەکانی سوپای نیشتمانی بەسەرۆکایەتی لیوا خەلیفە حەفتەر وتی: “لەچەند سەعاتی داهاتوودا شەڕێکی گەورە لەدەوروبەری شاری سەرت و جەفرە روودەدات”.