فەڕەنسا 300 هەزار یۆرۆ پێشکەشی عێراق دەکات

SNN

نێردەی نەتەوەیەکگرتووەکان لە عێراق رایگەیاند: فەڕەنسا بڕی 300 هەزار یۆرۆ (زیاتر لە 330 هەزار دۆلاری ئەمریکی) پێشکەشی حکومەتی عێراق دەکات و ئەو هاوکارییەش بۆ رووبەڕووبوونەوەی کۆرۆنا تەرخان دەکرێت.

یونامی بڵاویکردەوە: ئەو هاوکارییەی فەڕەنسا کە بە حکومەتی عێراقی دەبەخشێت بۆ کڕینی ئامێری هەناسەدانی دەستکرد و چارەسەرکردنی تووشبووانی کۆرۆنا لە نەخۆشخانەی فێرکاری بەسرە تەرخان دەکرێت.

دوو رۆژ لەمەوبەر ژان ئیف لۆدریان وەزیری دەرەوەی فەڕەنسا گەیشتە بەغدای پایتەختی عێراق و لەگەڵ هەریەک لە سەرۆککۆمار و سەرۆکوەزیرانی عێراق کۆبووەوە و دواتر سەردانی هەرێمی کوردستانی کرد و لەگەڵ سەرۆکی هەرێم و سەرۆکی حکومەتی هەرێم کۆبووەوە.

وەزیری دەرەوەی فەڕەنسا لە میانی کۆبوونەوەکانیدا رایگەیاندبوو: فەڕەنسا هاوکاری تەندروستی پێشکەشی عێراق و هەرێمی کوردستان دەکات.