بازاڕى خانووبەرە لەنێوان کێشە سیاسیەکان و قەیرانى دارایدا

لە هەر گفتوگۆیەک یان کێشەیەکى سیاسى کە باسى پارە و مووچەى تێدابێت راستەوخۆ بازاڕى خانووبەرە گۆڕانکارى بە خۆوە دەبینى، لە ئێستاشدا کە سەردەمى ڤایرۆسى کۆرۆنا و دابەزینى نرخى نەوتە، بەشى زۆرى نوسینگەکانى خانووبەرە تووشى داروخانى ئابوورى بوون.

نازم کاکە حەمە، خاوەنى نوسینگەى کڕین و فرۆشتنى خانوو زەویە لە شارى سلێمانى بە snnى راگەیاند “”لە بەیانیەوە تاوەکو ئێوارە دووکان دەکەینەوە بە دەگمەن کەسێک روومان لێ دەکات ئەوەشى کە دێت بە مەبەستى پرسیار کردنى خانوى کرێیە نەوەکو کڕێن و فرۆشتن”.

وتیشى، “بەپێى ئەزموونى ئێمە لەم بازاڕەدا هەرکات گۆڕانکاریەکى سیاسى و ئابوورى لە هەرێمى کوردستان و ناوچەکەش ڕوو بدات ئەوا ئێمە رووبەڕووى بێبازاڕى و گرفت دەبینەوە”.

هاوکات ئاماژەى بەوەش کرد “لە ئێستادا بەشێک لە خاوەن نوسینگەکان پارەکانیان قفڵ بووە بەوەى کە موڵکێکى زۆرى کڕیوە و لە ئێستاشدا بازاڕنیە خەڵک مەترسى لە دۆخەکە هەیە و ئەو پارەى کە هەیەتى ناهێنێتە بازاڕ و دەڵێن تاوەکو دۆخەکە بەلایەکدا دەکەوێت پارەکانمان لاى خۆمان پارێزراوتر دەبێت”.