بەڕێوەبەری تەندروستیی ڕاپەڕین لەژێر فشاری هاووڵاتییاندا دەستیلەکارکێشایەوە

SNN-محەمەد مستەفا

دوای ئەوەی بەشێکی زۆری هاووڵاتییانی ڕاپەڕین داوای دەستلەکارکێشانەوەی بەڕێوەبەری تەندروستیی ڕاپەڕینیان کرد بەهۆی کێشە و گرفتەکانی تەندروستی سنوورەکەیان، بەڕێوەبەری گشتی تەندروستی ڕاپەڕین دەستیلەکارکێشایەوە .

لە نوسراوێکدا کە ئاڕاستەی لایەنە پەیوەندیدارەکانی کردووە، د.هیوا مەحموود بەڕێوەبەری گشتی تەندروستیی ڕاپەڕین باس لەوە دەکات: بەهۆی هۆکارێکی تایبەت دەست لە پۆستەکەی دەکێشێتەوە، بەڵام SNN زانیویەتی ئەم بریارەی بەڕێوەبەری تەندروستیی ڕاپەڕین لەژێر کاریگەری و فشاری زۆری ناڕەزایی هاووڵاتییانی سنوورەکەیدا دراوە .

هاوکات سەرچاوەیەک لە تەندروستیی ڕاپەڕین بە SNN ی راگەیاند: ئەمڕۆ یەک شەممە د.هیوا مەحموود پۆستی بەڕێوەبەری تەندروستیی ڕاپەڕینی بەجێهێشتووە و جێگری بەڕێوەبەر کارەکانی ئەو بەڕێوەبەرایەتییە راییدەکات تا دانانی بەڕێوەبەرێکی نوێ .

بۆ وەرگرتنی لێدوانی د.هیوا مەحمود لەسەر هۆکاری دەست لەکارکێشانەوەی SNN چەند جارێک پەیوەندی کرد بە ناوبراوەوە بەڵام وەڵامی پەیوەندیەکەی نەدرایەوە .