خاوەن رێستۆرانت و چێشتخانەکان لە هەولێر گردبوونەوە

SNN

بەمەبەستی کردنەوەی رێستۆرانت و چێشتخانەکان لە شاری هەولێر ژمارەیەک هاووڵاتیی گردبوونەوە و داوای کردنەوەیان دەکەن، قایمقامی شارەکەش دەڵێت “بەرژەوەندی گشتی لە پێش هەموو شتێکە”.

ئەمڕۆ چوارشەممە ژمارەیەک لە خاوەن ریستۆرانت و خواردنگەکانی شاری هەولێر لە بەردەم بینای پارێزگای هەولێر گردبوونەوە و داوایانکرد دەست بکەنەوە بە کاری خۆیان.

نەبەز عەبدولحەمید قایمقامی هەولێر رایگەیاند “پشتگیری لە داواکاریی ئەو هاووڵاتییانە دەکەین، بەڵام پێویستە رەچاوی بەرژەوەندی گشتیش بکرێت، چونکە هێشتا ڤایرۆسی کۆرۆنا لەژێر کۆنترۆڵدا نییە و جێی مەترسییە”.

لەسەر ئەو  پرسەش پارێزگای هەلێر لەکۆبوونەوەدایە تا بڕیار و رێنمایی نوێ بۆ خاوەن چێشتخانەکان دەر بکات و رەنگە بە خۆپارێزییەوە بەشێک لەو رێستۆرانتانە رێگەیان پێبدرێت بکرێنەوە.

لە پارێزگای هەولێر تائێستا 9171 کەس تووشی کۆرۆنا بوون و 4570  یان چاکبوونەتەوە و 265 کەسیش بە ڤایرۆسی کۆرۆنا گیانیانلەدەستداوە.