ڤیدال لەگەڵ یانەیەکی ئیتاڵی رێککەوت

SNN Sport

ئارتۆرۆ ڤیدالی چیللی و یاریزانی هێڵی ناوەندی یانەی بەرشەلۆنە، لەگەڵ یانەی ئینتەرمیلانی ئیتاڵی رێککەوتووە و دەیەوێت لە گواستنەوەکانی ئەم هاوینە پەیوەندی بەو یانەیەوە بکات.

رۆژنامەی لاگازێتا دیلۆ سپۆرت لە ژمارەی ئەمڕۆ سێشەممەیدا بڵاویکردووەتەوە، ڤیدال رێککەوتنی تەواوی لەگەڵ یانەی ئینتەرمیلان کردووە، ئەو یاریزانە بۆ 2 ساڵ و بە مووچەیەکی 6 ملیۆن یۆرۆیی پەیوەندی بە یانەکەی کۆنتی دەکات، لە ئێستادا چاوەڕوانی جیابوونەوەی کۆتاییە لەگەڵ یانەی بەرشەلۆنە.

ڤیدال رۆژی دووشەممە بەشداری مەشق و راهێنانەکانی یانەی بەرشەلۆنەی کرد، ئەو یاریزانە لە لایەن کومانی راهێنەرەوە داوای رۆشتنی لێکراوە و راهێنەرە هۆڵەندیەکە لە وەرزی داهاتوو پشت بە تواناکانی نابەستێت و لە پلانەکانی خۆی دوریخستووەتەوە.

یانەی بەرشەلۆنە لە لایەن راهێنەرەکەیەوە چەند یاریزانێکی بۆ جێهێشتنی یانەکە ئاگادارکردووەتەوە، چاوەڕوان دەکرێت لە رۆژانی داهاتوو راکیتچ پەیوەندی بە یانەی سڤییاوە بکات و چەند یاریزانێكی تری دیاری یانەکە لە رۆژانئ داهاتوو ماڵئاوایی دەکەن.