11 جۆری ڤاکسین لە کۆتا قۆناغی تاقیکردنەوەدان

SNN

کۆمپانیای بایۆتێکنۆلۆجی ئەمریکی نۆڤاڤاکس رایگەیاند: تاقیکردنەوەکانیان لەسەر ڤاکسینێکی دژ بە کۆرۆنا چووەتە کۆتا قۆناغەوە. ئەمەش دەبێتە 11هەمین جۆری ڤاکسین کە ئێستا لە کۆتا قۆناغی تاقیکردنەوەدایە.

کۆمپانیا ئەمریکیەکە سەبارەت بە تاقیکردنەوەکانی وتوویەتی: لە کۆتا قۆناغدا 10 هەزار خۆبەخش بەشدارن کە تەمەنیان لە نێوان 18 بۆ 84 ساڵدایە.

وتیشی: تاقیکردنەوە لەسەر خۆبەخشەکان لە وڵاتی بەریتانیا بەڕێوەدەچێت، ئێمە گەشبینین بەو ڤاکسینەی کە پەرەمانپێداوە، بەوەی کاریگەری باشی دژ بە ڤایرۆسەکە دەبێت.

جگە لەو کۆمپانیا ئەمریکییە، لە ئێستادا زانکۆی ئۆکسفۆرد لە بەریتانیا سەرقاڵی کۆتا تاقیکردنەوەیە لەسەر ڤاکسینێکی، چەند کۆمپانیایەکی ناوداریش لە نێویاندا مۆدێرنا، فایزەر، ئەسترازێنکا، سەرقاڵی تاقیکردنەوەن، ڤاکسینەکانی دیکەش لە ڕوسیا و چین کاریان لەسەردەکرێت.

تا ئێستا تەنیە لە ڕوسیا و چین دەست بە دابەشکردنی ڤاکسینی کۆرۆنا بەسەر هاووڵاتییان کراوە، عێراقیش رایگەیاندووە: هەرکاتێک رێکخراوی تەندروستی جیهانی ڤاکسینێکی پەسەندکرد، بەدەستیدەهێنێت.