بەدواداچوون دەکرێت بۆ فڕێدانەخوارەوەی دوو جوتیاری کورد لە هەلیکۆپتەرێکی تورکیاوە

SNN

ماڵپەڕی ئەلمۆنیتەری ئەمریکی دەلێت، سەربازانی تورکیا تۆمەتبارن بەوەی دوو جوتیاریان لە شاری وانی باکووری کوردستان خستووەتە ناو هێلیکۆپتەرێکەوە و ئەشکەنجەیانداوە و دواتر لە ئاسمانەوە فڕێیانداوەتە خوارەوە، داواکارانی گشتی تورکیاش بەدواداچوون بۆ ئەو تۆمەتانە دەکەن.

ماڵپەڕە ئەمریکییەکە دەڵێت، ئەو رووداوەی کە باسی لێوەدەکرێت لە 11ی ئەم مانگە روویداوە، بووەتە ئاماژەیەک بۆ کاریگەرییە ترسناکەکانی شەڕی نێوان پەکەکە و سوپای تورکیا، لەسەر هاووڵاتییان.

جوتیارەکان کوردن و ناویان عوسمان سیبان تەمەن 50 ساڵ، سەروەت تورگوت 55 ساڵە، دیمەنی دەمووچاوە خوێناویەکانیان کۆمەڵگای کوردی هەژاندووە، پەرلەمانتارانی پارتی هەدەپە، لەوبارەیەوە داوای دروستکردنی لیژنەیەکی پەرلەمانی دەکت تا بەشێوەیەکی دادپەروەرانە لێکۆڵینەوەی لەسەر بکرێت.

ئێستا تورگوت لە نەخۆشخانەی وان-ە، لە ژێر چاودێری چڕدا و لە حاڵەتی بێ هۆشیدایە، حسێنی کوڕی وتوویەتی، باوکی 11 پەراسووی شکاوە و چانسی مانەوەی لە ژیان زۆر لاوازە.

کوڕەکەی دەڵێت، ئێمە دادپەروەریمان دەوێت بەڵام حکومەتی تورکیا دەیەویت رووداوەکە پەردەپۆشبکات و راستییەکان زیندەچاڵ بکات.

هەرچی سیبان-یشە، ئەم هەفتەیە لە نەخۆشخانەی سەربازی چووەتە دەرەوە، بەڵام بەهۆی ئەو رووداوەی کە بەسەریهاتووە، تووشی لەدەستدانی یادوەری بووە، حامید کۆجاک، یەکێک لە پارێزەرانی کەیسەکە دەڵێت: “سیبان شوێن و کاتی لێتێکچووە و وەکو منداڵ قسە دەکات”.

ئەو پارێزەرە تۆمەتەکانی “ئەشکەنجە و هەوڵی کوشتنی بەمەبەست، کەمتەرخەمی لەکاتی ئەرکدا” دەخاتە ئەستۆی سەربازە تورکەکان.

رووداوەکەی وان لەدوای ئۆپراسیۆنێکی سەربازیدابوو دژ بە پەکەکە لە نزیک سوریک، لەو شەڕەدا سێ سەربازی تورکیا و سێ گەریلا کوژران.