ئاسایشی ڕاپەڕین فێڵێکی جیاوازی باندێکی بازرگانی مادەی هۆشبەر ئاشکرا دەکات

SNN-محەمەد مستەفا

باندێکی بازرگانی مادەی هۆشبەر لە ڕاپەڕین کە دەیانویست لەناو تایەی ئۆتۆمبێل مادەی هۆشبەر بگوازنەوە بۆ سنووری پارێزگای دهۆک دەستگیرکران .

محەمەد فازیڵ بەرپرسی راگەیاندنی ئاسایشی ڕاپەڕین بە SNN ی راگەیاند: هێزەکانی ئاسایش لە بازگەی (بانوەقەل)ی نێوان ڕانیە و پشدەر بە هاوکاری ئاسایشی پشدەر توانیویانە دەستبگرن بەسەر ئۆتۆمبێلێک کە بڕی چوار کیلۆگرام مادەی هۆشبەری لە جۆری (کرێستاڵ) لە ناو تایەی سپێری ئۆتۆمبێلەکە شاردرابووەوە .

وتیشی: “بە تۆمەتی بازرگانی بەو بڕە مادە هۆشبەرە هێزەکانی ئاسایش 4 کەسیان دەستگیرکردووە، کە ویستویانە ئەو مادەیە بگوازنەوە بۆ قەزای زاخۆ لە پارێزگای دهۆک “.

باسی لەوەشکرد: تۆمەتبارەکان دانیان ناوە بە تاوانەکەی خۆیاندا و بە گوێرەی مادەی 14 ی یاسای مادە هۆشبەرەکان دەستگیرکراون رەوانەی دادگا کراون .