هۆکاری بەرزبوونەوەی ژمارەی تووشبووانی کۆرۆنا لە عێراق ئاشکرادەکرێت

ئەندامێکی لیژنەی قەیرانەکانی عێراق رایگەیاندووە، یەکێک لە هۆکارەکانی زیادبوونی ژمارەی تووشبووان بە کۆرۆنا لە عێراق بۆ پابەندنەبوونی هاووڵاتییان بە رێکارە تەندروستییەکان دەگەڕێتەوە.

غەنی ساعدی لە لێدوانێکیدا بۆ میدیاکانی عێراق رایگەیاندووە، بەتایبەتی لە شاری بەغدا، هاووڵاتیان کەمتر پابەندی رێکارەکانی خۆپارێزین لە کۆرۆنا، قەرەباڵغی کەمناکەنەوە.

ناوبراو باسی لەوەکردەوە، ئەوکاتەی ئاسانکاری بۆ رێکارە تەندروستییەکان کرا رێژەی تووشبوون بە کۆرۆنا زیادیانکرد، لەکاتێکدا پێشتر عێراق لەوە نزیکبوو کە کۆنتڕۆڵکردنی پەتای کۆرۆنا رابگەیەنێت.

ئەمە لەکاتێکدایە پێشتر، فەرماندەیی ئۆپەراسیۆنەکانی بە‌غدا رایگەیاند، لەسەرەتای جێبەجێکردنی بڕیاری قەدەغەی هاتوچۆ تاوەکو 9ی ئەم مانگە، 98 هەزار و 489 شۆفێر بەهۆی پابەندنەبون بە رێنماییەکان سزادراون و زیاتر لە 40 هەزار کەسیش دەستبەسەرکراون.

تا ئێسستا دوو هەزار و  437حاڵەتی تووشبوون بە کۆرۆنا لە عێراق تۆمارکراوە لەو ژمارەیەش هەزار و 702 چاکبوونەتەوە و 107 کەسیش گیانیان لەدەستداوە.