هەفتەی داهاتوو شاندی هەرێم دەچێتەوە بەغدا

SNN- بڕیار محەمەد 

بڕیار وایە ناوەڕاستی هەفتەی داهاتوو شاندی هەرێمی كوردستان بە سەرۆكایەتی قوباد تاڵەبانی بچێتەوە بەغدا بۆ پرسی رێكکەوتن لەسەر ناردنی شایستە داراییەكان و لەگەڵ بەپرسانی عێراق دەست بکەنەوە بە دانوستاندنەکان.

سەرچاوەیەكی ئاگادار بە SNNی راگەیاند: بڕیار وایە لە ناوەڕاستی هەفتەی داهاتوو شاندێکی حكومەتی هەرێمی كوردستان بە سەرۆكایەتی  قوباد تاڵەبانی جێگری سەرۆكی حكومەتی هەرێمی كوردستان بچێتەوە بەغدا و لەگەڵ بەرپرسانی حكومەتی عێراق كۆببێتەوە .

وتیشی: “لە كۆبوونەوەكاندا باس لە پرسی ناردنی شایستە داراییەكان و بوودجەی ساڵی‌ 2021 و چەندین پرسی تر دەكرێـت كە تایبەتن بە مووچە و شایستە داراییەكانی هەرێمی كوردستان جگە لە پرسی رێكکەوتنی نێوان هەرێم و بەغدا و ناردنی 320 ملیارەکەش دەکرێت”.

لە ماوەی رابردوو شاندی هەرێمی كوردستان بە سەرۆكایەتی قوباد تاڵەبانی جێگری سەرۆكی حكومەتی هەرێمی كوردستان سەردانی بەغدایان كردووە لە دوایین سەردانیشدا هەردوولا رێكکەوتن لەسەر ناردنی مانگەی 320 ملیار دینار بۆ پێدانی مووچەی فەرمانبەرانی هەرێمی كوردستان تا ئەو کاتەی بودجەی عێراق بۆ ساڵی 2021 ئامادە دەبێت .