پێشانگای کتێبی ئەمساڵی سلێمانی زۆرترین دەنگدانەوەی جیهانی هەبوو
SNN-هەڵکەوت سەروەت
پاش کۆتایی هاتنی ۱۰یەمین ڕۆژی پێشانگای کتێب لە سلێمانی، رێکخەرانی پێشانگاکە رایانگەیاند ئەمساڵ زۆرترین سەردانیکار ڕوویان لە پێشانگاکە کردووە و دەنگدانەوەی باشی لەسەر ئاستی عێراق و ناوچەکە هەبوو.
مەروان حەمە خورشید بەرپرسی ڕاگەیاندنی پێشانگای کتێب کە لە سلێمانی بە SNNی راگەیاند: ئەمساڵ ئەمە پێنجەمین پێشانگای کتێبە لە جیهاندا ئەنجامدراوە و ئەمەش وایکرد دەنگدانەوەی باشی لە ڕۆژنامەکانی جیهان هەبێت و زۆرترین سەردانی پێشانگاکەیان کراوە کە نزیکەی 150 هەزار کەس دەبێت.
ئەو وتەبێژە وتیشی: فڕۆشیارانی کورد زۆر لە ئاستی فرۆشی ئەمساڵ رازین و بە گشتی ئەمساڵ لە یەکەمین ساڵی کردنەوەی پێشانگاکە باشتر بووە، بەڵام تا ئێستا ئاماری تەواوی فرۆش و زۆرترین جۆری فرۆشمان بەردەست نییە و لەچەند رۆژی داهاتوودا ئەو ئامارانەش بەردەست دەبێت.
پێشانگای کتێب بۆ دوەمین جار لە پێشانگای نێودەوڵەتی سلێمانی کارەکانی بەرێوەبرد و سەرەڕای هەبوونی ڤایرۆسی کۆرۆنا بەڵام ئەمساڵ ژمارەیەکی زیاتر لە هاووڵاتیان سەردانی ئەو پێشانگایەیان کرد.
