10ی مانگی داهاتوو پرۆسەی خوێندن لە هەرێمی کوردستان دەستپێدەکاتەوە
وێنە: SNN
بڕیار محەمەد-SNN
لیژنەی پەروەردە لە پەرلەمانی کوردستان ئەمڕۆ لە کۆنفرانسێکی رۆژنامەوانیدا رایگەیاند: 10ی مانگی داهاتوو پرۆسەی خوێندن لە سەرجەم ناوەندەکانی خوێندن لە هەرێمی کوردستان دەستپێدەکاتەوە.
عەبدولسەلام دۆڵەمەڕی سەرۆکی لیژنەی پەروەردە و خوێندنی باڵا لە پەرلەمان، لەدوای کۆبوونەوەی لەگەڵ وەزیری پەروەردە و خوێندنی باڵا و توێژینەوەی زانستی، لە کۆنفرانسێکی رۆژنامەوانیدا رایگەیاند: بڕیاردراوە کرێی ساڵانەی قوتابخانە ئەهلییەکان و زانکۆ ئەهلییەکان لەسەدا 20 کەمبکرێتەوە.
راشیگەیاند: قۆناغی 12 لەناو پۆلدا وانە دەخوێنن.
ئاماژەی بەوەشدا: تاقیكردنەوەی تەمهیدی لە ناحیە و قەزاكانی خۆیان تاقیكردنەوە دەكەن.
راشیگەیاند: لەبارەی دامەزراندنی سێ یەكەمەكانی زانكۆ و پەیمانگەكانیش وەزارەتی خوێندنی باڵا نووسراوێك بەرز دەكاتەوە و بۆ ئەوەی بەپێی یاسا بەركارەكان ئەگەر شوێنێك بۆشایی هەیە دابمەزرێن.
لەبارەی مافی مامۆستایانی وانەبێژ ئالان حەمە سەعید رایگەیاند: بەپێی بڕیاری سەرۆكی حكومەتی هەرێمی كوردستان هەماهەنگی لەنێوان وەزارەتی پەروەردە و دارایی كراوە تاوەكو مافە داراییەكانی مامۆستایانی وانەبێژ دابین بكرێت، هەروەها دابینكردنی مامۆستایانی وانەبێژ لە كەمپی پەنابەران لە سنووری هەرێمی كوردستان.
لەلایەن خۆشیەوە د. عەبدولفەتاح عەبدولرەزاق بریكاری وەزارەتی خوێندنی باڵا وتی: ئەمساڵ ژمارەیەكی زۆری خوێندکاران لە ناوەندەكانی زانكۆ و پەیمانگاكان وەرگیراون و ئەوەش هەندێك كێشەی تەكنیكی بۆ دروست كردین، چونكە ئێمە توانای وەرگرتنی 45 هەزار كورسی بوو، بەڵام نزیكەی 53 هەزار قوتابیمان وەرگرت، كە ئێمە وەك وەزارەتی خوێندنی باڵا خۆمان لەگەڵ دۆخی تەندروستی گونجاندووە بە خوێندنی تێكەڵ لە نێوان كەمپەس و ئۆنڵایندا.
