تەندروستی جیهانی: زیاتر لە 100 جۆری پێکوتەی کۆرۆنا دروستدەکرێت
SYLVAIN LEFEVRE
رێکخراوی تەندروستی جیهانی رایگەیاند: زیاتر لە 100 جۆری پێکوتەی دژ بە ڤایرۆسی کۆرۆنا لە جیهاندا گەشەیان پێدەدرێت.
مارگەرێت هاریس وتەبێژی رێکخراوەکە لە کۆنفرانسێکی رۆژنامەنووسیدا رایگەیاند: “زانایان گرفتیان لەگەڵ رەفتاری ڤایرۆسی کۆرۆنا هەیە کە فریودەرە، هەوڵەکانیش بۆ بەرهەمهێنانی پێکوتەیەکی گونجاو دژ بە کۆرۆنا بەردەوامە”.
هاریس ئاماژەی بەوەکردووە: “لە نێو ئەو پێکوتانەی کە زانایانی جیهان بەرهەمی دەهێنن پێنج بۆ شەش پێکوتەیان ئەنجامی ئومێدبەخشی هەیە”.
سەبارەت بەو دەرمانانەی چەند وڵاتێک بە مەبەستی چارەسەرکردنی حاڵەتەکانی تووشبوون بەکاریدەهێنن، هاریس رایگەیاند: “پێویستە وڵاتان ئامار و زانیاری لەبارەی تاقیکردنەوەی دەرمانەکانەوە بە رێکخراوەکەمان بدەن تا دڵنیابینەوە لە کاریگەری دەرمانەکان”.
لە جیهاندا زیاتر لە چوار ملیۆن و 200 هەزار حاڵەتی تووشبوو بە کۆرۆنا تۆمارکراوە، لەو ژمارەیە زیاتر لە ملیۆنێک و 500 هەزار کەس چاکبوونەتەوە و زیاتر لە 200 هەزار کەسیش گیانیان لەدەستداوە.
