لە هەولێر کڕین و فرۆشتن و بەکرێدانی خانوو وەستاوە

SNNـ بڕیار محەمەد

بەهۆی پشووەکانی سەری ساڵەوە لە ئێستادا کڕین و فرۆشتن و بەکرێدانی خانوو و زەوی لە هەولێر راگیراوە و تا وەکو دوای سەریساڵ دەوەستێت.

سەردار ئازاد، خاوەنی نوسینگەی عەقاراتی ئەملاک، بەSNNی راگەیاند: بازاری خانووبەرە وەستاوە و کڕین فرۆشتن و بەکرێدانی خانوو و زەوی ئەنجام نادرێت، هوکارەکەشی  بۆ ئەوە دەگەرێتەوە کە حکومەتی هەرێمی کوردستان پشووی سەری ساڵی راگەیاندووە، دەوامیش لە دام و دەزگاکانی حکومەت  و ئاسایش تا 3/1/2021 نییە بۆیە هەموو مامەڵەیەک تا ئەو کاتە وەستاوە .

وتیشی: بەهۆی بەرزبوونەوەی بەهای دۆلار بەرامبەر بە دیناری عێراقی کاریگەری زۆری لەسەر بازاری کڕین و فرۆشتن و بەتایبەتیش ئەو موڵکانەی بەکرێدراون هەیە، ساڵی داهاتووش خەڵکێکی زۆر تووشی ئەو کێشەیە دەبن.

ئاماژەی بەوەشکرد: پێشتر ئەگەر کەسێک خانوو یان شوقەیەکی بەکرێ گرتبێت بە 400 دۆلار ئەوا ئێستا  لەسەری بۆتە  590 هەزار دینار چونکە ئەو مووچە وەردەگرێت بەدینار و بەدۆلاریش خانوو و شوقەی بەکرێ گرتووە بۆیە ئێستا کێشەیەکی زۆر لەنێوان خاوەن موڵک و کرێچیدا دروست بووە.