سبەی شاندی دانوستانكار لەگەڵ یەكێتی و گۆڕان و یەكگرتوو كۆدەبێتەوە

SNN- بڕیار محەمەد 

سبەی لە شاری سلێمانی شاندی دانووستانكاری هەرێم لەگەڵ هەریەكە لە یەكێتیی نیشتمانیی و بزوتنەوەی گۆڕان و یەكگرتووی ئیسلامی كۆدەبێتەوە، ئامانج لە كۆبوونەوەكەش وەرگرتنی را و سەرنجی لایەنە سیاسییەكانە بۆ گەیشتن بە رێكکەوتنی كۆتایی لەگەڵ حكومەتی عێراق .

سەرچاوەیەكی ئاگادار لە نێو شاندەكە بەSNNی راگەیاند “بڕیارە سبەی سێشەممە شاندی هەرێم بۆ دانوستان لەگەڵ بەغدا بە سەرۆكایەتی قوباد تاڵەبانی جێگری سەرۆكی حكومەتی هەرێمی كوردستان لەگەڵ یەكێتیی و گۆڕان و یەكگرتووی ئیسلامی كۆبێتەوە دواتر لە شاری هەولێر لەگەڵ پارتی و كۆمەڵی ئیسلامی كوردستانیش كۆببێتەوە” .

سەرچاوەكە وتیشی: “ئامانج لە سەردانەكە خستنەڕووی گفتوگۆكان دەبێت لەگەڵ حكومەتی عێراق و وەرگرتنی را و سەرنجی لایەنە سیاسییەكانە لەبارەی رێكکەوتنی هەرێمی كوردستان لەگەڵ حكومەتی عێراق” .

ئەو سەردانانە لەكاتێكدایە هەفتەی رابردوو قوباد تاڵەبانی سەرۆكی شاندی دانوستانكاری هەرێمی كوردستان رایگەیاند “بۆ گەیشتن بە رێكکەوتن لەگەڵ حكومەتی عێراق لە یەكتر نزیكین و پشكی كورد لە پرۆژە بودجەی ساڵی‌ 2021دا دیاریكراوە ئێستا تۆپەكە لە گۆڕەپانی  ئەنجوومەنی نوێنەرانی عێراقدایە بۆ پەسەندكردنی بەشە بودجەی هەرێمی كوردستان بۆ ساڵی 2021.”