حزبە کوردستانییەکانی کەرکوک خۆیان بۆ هەڵبژاردن ئامادە دەکەن

SNN

ئەمڕۆ سێشەممە 16 حزبی کوردستانی لە شاری کەرکوک لە بارەگای حزبی شیوعی کوردستان کۆبوونەوە، ئەو حزبانە نیگەرانن لە ئاستی خزمەتگوزارییەکانی شارەکە و تاوتوێی پێکهێنانی لیستێکی هاوبەشیش کراوە بۆ هەڵبژاردنی داهاتووی عێراق.

بەگوێرەی زانیارییەکانی SNN حزبە کوردستانییەکان خەریکی خۆ ئامادەکردنن بۆ چوونە ناو هەڵبژاردنە پەرلەمانییەکەی حوزەیرانی ئەمساڵ و دەنگۆی ئەوەش هەیە وەفدێکی ئەو حزبانە سەردانی هەولێر بکات.

حەمە سوور دووشیوانی لێپرسراوی مەڵبەندی دووی کەرکوکی یەکێتیی نیشتمانیی کوردستان بە SNN ی راگەیاند “ئەو کۆبوونەوانەیان دەورییە و بۆ باسکردنی پرسە هەنووکەییەکانە، وتیشی: “ئەوان ناڕازین لە ئاست خزمەتگوزاریی ناوەند و حکومەتی خۆجێیی کەرکوک بەرامبەر بە شارەکە”.

سەبارەت بە پێکهێنانی لیستێکی هاوبەش بۆ هەڵبژاردنەکان دووشیوانی وتی: “باسی ئەو بابەتە کراوە، بەڵام هێشتا زووە بڕیاری یەکلاکەرەوە بدەین”.

بەگوێرەی زانیارییەکان چاوەڕێدەکرێت وەفدێکی شەش لایەنی کوردستانیی کەرکوک بچنە شاری هەولێر و لەگەڵ پارتی کۆببنەوە بەمزووانە.

لەمبارەیەوە لێپرسراوی مەڵبەندی کەرکوک رایگەیاند “کە ئەوان زانیاری وایان لا نییە، بەڵام رەنگە لە داهاتوودا ئەوە روو بدات”.

رۆژی 31-7-2020، مستەفا كازمی سەرۆكوەزیرانی عیراق رایگەیاند، لە 6ی حوزەیرانی 2021 هەڵبژاردنی پێشوەختە دەكرێت و پشتیوانی ناوخۆیی و دەرەکیشی بۆ ئەم بابەتە هەیە.