زهعیم عهلى: ئهنجامى سهرجهم كۆبوونهوه و سهردانهكانمان بهیهكهوه رادهگهیهنین
كۆبوونهوهى شاندى سیاسى پارتى دیموكراتى كوردستان لهگهڵ شاندى سیاسى كۆمهڵى ئیسلامى له سلێمانى | فۆتۆ: SNN
SNN
سهرۆكى شاندى سیاسى پارتى دیموكراتى كوردستان بۆ سهردانیكردنى لایهنهكان رایدهگهیهنێت: گهڕى كۆبوونهوه و سهردانهكانمان كۆتاییهات ئهنجامهكهى بهیهكهوه رادهگهیهنین، وتهبێژى كۆمهڵى ئیسلامیش دهڵێت: “جهختمان لهسهر ئهوه كردهوه كه چاكسازیی ریشهیی بكرێت”.
ئهمڕۆ یهكشهممه شاندى سیاسى پارتى دیموكراتى كوردستان كه پێكهاتوون له: زهعیم عهلى، كاكهمین نهجار، پشتیوان سادق و عهلى حسێن سهردانى شارى سلێمانیان كرد و لهگهڵ شاندى كۆمهڵى ئیسلامى كه پێكهاتوون له: محهمهد حهكیم، ڕێبوار حهمهد، ئاڤان محهمهد، حاجى هێمن و محهمهد بامۆكى كۆبوونهوه.
له دواى كۆبوونهوهكه زهعیم عهلى، ئهندامى سهركردایهتى پارتى دیموكراتى كوردستان لهبهردهم میدیاكان رایگهیاند: “ئێمه له كۆبوونهوهكانماندا جهختدهكهینهوه لهسهر بابهته ههنووكهییهكانى ئێستا وهك: ههڵبژاردنهكان، قهوارهى ههرێمى كوردستان، یهكڕیزى لایهنهكان، قهوارهى سیاسى ههرێم”.
ئهندامهكهى سهركردایهتى پارتى دیموكراتى كوردستان له وهڵامى میدیاكاراندا لهبارهى پێكهێنانى لیستى هاوبهشهوه ئهوهشى خستهڕوو: “تا ئێستا باسى ئهو بابهتهمان نهكردووه”.
ئاماژهى بهوهشكرد: ” كه گهڕى كۆبوونهوه و سهردانهكانیشمان بۆلاى لایهنه سیاسییهكان كۆتاییهات ئهنجامهكهى بهیهكهوه رادهگهیهنین”.
دواتر ڕێبوار حهمهد، وتهبێژى كۆمهڵى ئیسلامى لهبهردهم میدیاكاندا وتی: “ئێمه له كۆبوونهوهكانماندا جهختمان كردهوه لهسهر ئهوهى كه ههرێمى كوردستان پێویستى به چاكسازیی ریشهیی ههیه، بهتایبهت لهلایهن حزبه دهسهڵاتدارهكانهوه لهنێویشیاندا پارتى دیموكراتى كوردستان، ئهوهشمان باسكرد كه پێویسته حكومهتى ههرێم و حكومهتى ناوهندى كاربكهن بۆ ئهوهى رێكبكهون كۆتایی به كێشهكانیان بهێنن”.
كۆبوونهوهى شاندى پارتى لهگهڵ شاندى كۆمهڵ پاش كۆبوونهوهى ئهو شانده دێت لهگهڵ: یهكێتیى نیشتمانیى كوردستان، بزووتنهوهى گۆڕان، یهكگرتووى ئیسلامى كوردستان، بڕیاریشه پاشنیوهڕۆى ئهمڕۆ لهگهڵ حزبى سۆسیالیست دیموكراتى كوردستان كۆببنهوه.
