عێراق ژماره‌یه‌كى پێوانه‌ى كۆرۆناى تۆماركرد و وه‌زیرى ته‌ندروستی هۆشدارى ده‌دات
ده‌رمانڕێژكردنى مزگه‌وتێكى عێراق | فۆتۆت: AFP /Haidar Hamdani
ئه‌مڕۆ چوارشه‌ممه وه‌زاره‌تى ته‌ندروستى عێراق رایگه‌یاند: 119 حاڵه‌تى نوێى تووشبوون به كۆرۆنا له‌ماوه‌ى 24 كاتژمێردا تۆماركراون، ئه‌مه‌ش ریكۆردێكى نوێ بوو، چونكه له سه‌ره‌تاى بڵاوبوونه‌وه‌ى كۆرۆنا تا ئێستا رێژه‌ى له‌و شێوه‌یه تۆمارنه‌كراوه، وه‌زیرى ته‌ندروستى-یش ده‌ڵێت: “داوا له هه‌مووان ده‌كه‌م رۆڵى خۆیان ببینن”.
عه‌لى ته‌میمى، وه‌زیرى ته‌ندروستى عێراق له‌دواى تۆماركردنى ئه‌و ریكۆرده نوێیه له ژماره‌ى تووشبوواندا وتى: “من داوا له هه‌مووان ده‌كه‌م رۆڵى خۆیان بگێڕن له كه‌مكردنه‌وه بڵاوبوونه‌وه‌ى كۆرۆنا بۆ ئه‌وه‌ى بتوانین پێش بگرین به بڵاوبوونه‌وه‌ى”.
وتیشى: “داوا له پیاوانى ئاینى، سه‌رۆك عه‌شیره‌ت و مه‌رجه‌عیه‌تى ئاینى ده‌كه‌ین فشاره‌كانیان زیاتر بكه‌ن بۆ ئه‌وه‌ى هاووڵاتیانیان پابه‌ند بن به رێنماییه‌كانه‌وه”.
هه‌ر له‌وباره‌یه‌وه سه‌یف به‌رد، وته‌بێژى وه‌زاره‌تى ته‌ندروستى عێراق رایگه‌یاند: “راپۆرتى خۆمان له‌باره‌ى به‌رزبوونه‌وه‌ى ئاماره‌كانى كۆرۆنا له عێراق ره‌وانه‌ى لیژنه‌ى باڵاى ته‌ندروستى كردووه، بۆ ئه‌وه‌ى ئه‌وانیش بتوانن هه‌ڵوێستى خۆیانى له‌باره‌وه بڵێن و پلانى تایبه‌تى بۆ دابنێن”.
وتیشى: “ئه‌گه‌رى هه‌یه قه‌ده‌غه‌ى هاتووچۆى سه‌رتاسه‌رى رابگه‌یه‌نین، بۆ ئه‌وه‌ى هاووڵاتیان زیاتر پابه‌ندى رێنماییه‌كا بن، چونكه ئه‌و دۆخه‌ى كه ئێستا له عێراق به گشتى و له به‌غدا به تایبه‌تى هه‌یه ده‌ره‌ئه‌نجامى پابه‌ند نه‌بوونى هاووڵاتیانه”.
ئه‌مڕۆ وه‌زاره‌تى ته‌ندروستى رایگه‌یاند: 119 حاڵه‌تى نوێى تووشبوون به كۆرۆنا له 24 كاتژمێردا تۆماركراون كه 82 حاڵه‌تیان له به‌غدا-ن، ئاشكراشیكرد: هه‌ر ئه‌مڕۆ سێ كه‌س به‌هۆى ڤایرۆسه‌كه‌وه گیانیان له‌ده‌ستداوه له به‌غدا.
