مەحما خەلیل: کێشەی شەنگال کێشەی پەکەکە و تورکیا نییە

SNN

مەحما خەلیل قائیمقانی شەنگال دەڵێت” وەک شەنگالییەکان داواکارین هیچ هێزێکی ناشەرعی لەناو شەنگالدا نەمێنێت هەتا دەرگا نەکەنەوە و بیانوو نەدەن بەتورکیا و غەیری تورکیا پیلان و ئەجێندای خۆیان جێبەجێبکەن، دەشڵێت: داوامانکردووە یەک چەکدار لەسەنتەری شارەکە نەمێنێت و شەنگال ببێتە ناوچەیەکی لەچەک داماڵراو.”

” مەحما خەلیل لە اوپێکەوتنێکیدا لەگەڵ دەنگی ئەمریکا وتی: “کێشەی شەنگال کێشەیەک نییە لەنێوان پەکەکە و تورکیا، بەڵکو کێشەیەکە لەنێوان بەغدا و ئەنقەرە”.

قایمقامی شەنگال دەڵێت: “لەئێستادا دۆزی شەنگال بووەتە دۆزێکی نێودەوڵەتی و مرۆڤایەتی، شەنگال بەشێکە لەعێراق و سەربە پارێزگای موسڵ-ە، دەڤەرێکی وێران و جینۆسایدکراوە کێشەی شەنگال کێشەیەک نییە لەنێوان پەکەکە و تورکیا، بەڵکو کێشەیەکە لەنێوان بەغدا و ئەنقەرە هیوادارین چارەسەر بکرێت”.

بەوتەی مەحما خەلیل، وەک دەبینین حکومەتی عێراقی بەپێی دەستور دەبێت خۆی بکاتە خاوەنی قەزای شەنگال و خەڵکی شەنگال.”

دەربارەی ئەوەی لەحاڵەتی هێرشکردنە سەر شەنگال لەلایەن تورکیاوە چی دەکەن؟ مەحما خەلیل رایدەگەیەنێت: “وەک ئاماژەم پێکرد ئێمە بەشێکین لەعێراق، وەک خۆمان هیچ دەسەڵاتێکمان نییە حکومەتی بەغدا و پارێزگاری موسڵ دەبێت وەڵامی ئەو پرسیارە بدەنەوە، ئێمە وەک شەنگالییەکان دەڵێین نابێت یەک کێشە بێتە ناو شەنگال، شەنگالییەکان دەبێت بگەڕێنەوە، نەڕێگە بدرێت برایانی پەکەکە هێرش بکەن و نە ڕێگە بدرێت تورکیا هێرش بکاتە سەر شەنگال، دۆخی شەنگال تەحەمولی هیچ کێشە و شەڕێکی تر ناکات.”