قافڵەیەکی سوپای ئەمریکا دەچێتە سەر کێڵگەیەکی نەوتیی لە سوریا

SNN

قافڵەیەکی تەقەمەنی و پشتیوانی لۆجیستیی سوپای ئەمریکا بەرەو بنکەیەکی سەربازیی خۆی جووڵەی پێکراوە بۆ سەر کێڵگەی نەوتیی عومەر لە پارێزگای دێرەزور-ی سوریا.

ئاژانسی هەواڵی سانا-ی سوریی بڵاویکردووەتەوە “قافڵە سەربازییەکە لە دەروازە ناڕەسمییەکانی عێراقەوە بەرەو کێڵگە نەوتییەکە بەڕێکەوتووە کە گەورەترین کێڵگەی نەوتییە لە سوریا”.

ئاژانسەکە دەشڵێت: “ئامانجی ئەو هەنگاوەی ئەمریکییەکان پتەوکردنی هێزەکانی خۆیانە بەمەبەستی توندکردنی کۆنترۆڵی ناوچەی جەزیرە”.

هاوکات دوو هێلیکۆپتەری سوپای ئەمریکا لە ناوچەکە نیشتوونەتەوە و زیاتر لە 25 سەربازیان پێبووە و دوای نیشتنەوەی بۆ ماوەیەک بەرەو سنووری عێراق گڕاوەتەوە.

ئاژانسە سورییەکە رۆژی 28ی مانگی رابردووش رایگەیاندبوو “هێزەکانی سوپای ئەمریکا بنکەیەکی تازەیان لە ناوچەی یەعروبیە دامەزراندووە لە ریفی حەسەکە، بڕێکی زۆر چەک و تەقەمەنیشیان لێ داناوە”.