پێنتاگۆن لەبارەی داعشەوە راپۆرتێکی بڵاوکردەوە
وەزارەتی بەرگری ئەمریکا لە راپۆرتێکیدا رایگەیاند، داعش ریزەکانی رێکدەخاتەوە و هەڕەشەیە بۆ ئاسایشی عێراق و سوریا.
لە راپۆرتەکەی پێنتاگۆندا بڵاوکراوەتەوە: “داعش بە ئاستێکی کەم توانیویەتی سەرهەڵبداتەوە لەو ناوچانەی کە لە رابردوودا لە عێراق کۆنتڕۆڵیکردبوو، بەتایبەت لە ناوچە جێناکۆکەکان و لە بیابان و ناوچە شاخاوییەکانی باکور و رۆژئاوای بەغدا”.
لە راپۆرتەکەدا هاتووە: “فەرماندەیی ناوەندی ئەمریکا لە مانگی شوباتی رابردوودا رایگەیاندووە، داعش لە چیای مەخمور لە بەهێزبوونەوەدایە و دەیەوێت باکوور و رۆژئاوای عێراق کۆنتڕۆڵ بکاتەوە”.
ئەوەش خراوەتەڕوو: “فەرماندەیی ناوەندی ئەمریکا و دەزگای هەواڵگری بەرگری ئەمریکا بەدووری دەزانێت داعش خەلافەتەکەی دروستبکاتەوە و کەمبوونەوەی هێرشەکانی داعش لە سوریا ئاماژەیە بۆ ئەوەی داعش هاوشێوەی رابردووی بەهێزنابێتەوە”.
لە بەشێکی دیکەی راپۆرتەکەدا پێنتاگۆن باسی لە مەترسییەکانی ئەو زیندانانەی سوریا کردووە کە چەکدارانی داعشی لێ زیندانی کراون و رایگەیاندووە: “مەترسی هەیە زیندانیکراوانی داعش بەکۆمەڵ هەوڵی هەڵاتن بدەن”.
ئەمە لەکاتێکدایە، لە ماوەی رابردوودا چەکدارانی داعش هێرش و چالاکییەکانیان لە عێراق زیادکردووە و هێزە ئەمنییەکانیش هەوڵەکانیان لە شەڕی دژ بەو رێکخراوە چڕترکردووەتەوە.
