خۆبەڕێوبەری رۆژئاوا: تورکيا ئاوی فوراتی کەمکردووەتەوە

SNN

ئیداره‌ی خۆبه‌ڕێو‌به‌ری رۆژئاوای كوردستان رايگەياند: “توركیا جارێكیتر ده‌ستی داوه‌ته‌ هه‌وڵی تینووكردن و برسیكردنی خه‌ڵكی رۆژئاوا له‌ رێگه‌ی گرتنه‌وه‌ی ئاوی فوراته‌وه”‌ .

له‌ راگه‌یه‌نراوێكدا ئیداره‌ی خۆبه‌رێوه‌به‌ری رۆژئاوای كوردستان ئاماژەی بەوەکرد: “ئه‌وه‌ یه‌كه‌مجار نییه‌ توركیا ئاو له‌سه‌رخاكی سوریا ده‌بڕێت، ئەمە شەڕی تورکيايە لە دژی خەڵکی رۆژئاوا کە چەکەی گرتنەوەی ئاوی روباری فوراتە”.

ئەوەشی خستەڕوو: “له‌گه‌ڵ به‌رزبوونه‌وه‌ی پله‌كانی گه‌رما و نزیكبوونه‌وه‌ له‌ وه‌رزی هاوین خواست له‌سه‌ر ئاو بۆ كشتوكاڵ زیاد ده‌بێت، ئه‌نقه‌ره‌ هه‌ڵده‌ستێت به‌ بڕینی ئاوی رووباری فورات و ئه‌وه‌ش كێشه‌ بۆ دانیشتوان دروست ده‌كات”.

خۆبه‌ڕێو‌به‌ری رۆژئاوا راشيگەياند: “هۆشداری روودانی كاره‌ساتێك دەدەين كه‌ زیان دەگه‌یه‌نێت بە‌ خه‌ڵك و به‌روبومی كشتوكاڵی به‌تایبه‌ت دوای ئه‌وه‌ی ئاستی ئه‌و ئاوه‌ی ده‌ڕژێته‌ رووباره‌كه‌وه‌ به‌ته‌واوه‌تی دابه‌زیووه‌ و ئه‌وه‌ش به‌هه‌وڵی خنكاندنی دانیشتوانه‌كه‌ی و برسیكردنی لێكده‌درێته‌وه”‌.

هاوينی رابردوو، تورکيا ئاوی رووباری فوراتی کەمکردەوە کە لە تورکياوە دێت و بەناوخاکی سوريادا دەڕوات، ئەوەش وەک سەرپێچيکردن لە ياسا نێودەوڵەتييەکان لێکدرايەوە و بووە هۆی کەمئاوی لە ناوچەکانی دەوروبەری روبارەکە لە رۆژئاوای کوردستان.