زۆربوونی ژمارەی تووشبووان و مردن بە کۆرۆنا لە هەرێم بۆ پابەند نەبوونی هاووڵاتیان دەگەڕێتەوە
SNN
د. نەجمەدین حەسەن، بەرێوەبەری رێکخراوی تەندروستی جیهانی لە سلێمانی بە SNNی راگەیاند: ئەو بەرزبوونەوەی لە ژمارەی تووشبووانی کۆرۆنادا لە کاتی ئێستادا بەدی دەکرێت، بۆ ئەوە دەگەرێتەوە لە رۆژانی نەورۆز و پێش نەورۆزدا قەرەباڵخییەکی زۆر لەلایەن هاووڵاتیانەوە دروستکرا.
بەرێوەبەری رێکخراوی تەندروستی جیهانی لە سلێمانی روونیدەکاتەوە، لە رۆژانی پێش نەورۆزدا بینیمان قەرەباڵخییەکی زۆر لە نێو بازاڕدا و لە شوێنە گشتییەکان بوونی هەیە، ئەمە سەرەڕای هاتنە ناوەوەی ژمارەیەکی زۆری گەشتیار بۆ شارەکانی هەرێم، لەگەڵ ئەوەشدا هاووڵاتیان پابەندی رێنماییە تەندروستییەکان نەبوون، بۆیە پێشبینی ئەوە کرا ژمارەی تووشبووان و گیانلەدەستدان بە کۆرۆنا بگاتەوە ئاستێکی بەرز لە هەرێمی کوردستان.
دکتۆر نەجمەدین ئەوەشی روونکردەوە، پێشبینی ناکەین دۆخەکە لە کۆنترۆڵ دەربچێت، چونکە کارمەندان و پزیشکانی تەندروستی لە هەرێمی کوردستان ئەزموونی تەواویان بەرامبەر ڤایرۆسەکە و چۆنیەتی مامەڵەکردن لەگەڵیدا پەیداکردووە و دۆخەکە لەگەڵ ساڵی پاردا تەواو جیاوازە.
