جۆرێکی دیکەی ڤاکسینی کۆرۆنا دەگاتە هەرێم

SNN

بریکاری وەزارەتی تەندروستی هەرێم رایگەیاند: زیاتر لە ملیۆنێک ڤاکسینی کۆرۆنا دەگاتە هەرێمی کوردستان کە لەلایەن هاوپەیمانێتی کۆڤاکسەوە بەرهەمهێندراوە.

د.ڕەهێڵ فەرەیدوون، بریکاری وەزارەتی تەندروستی هەرێم لە لێدوانێکیدا بۆ SNN وتی: “ئەو جۆرەی ڤاکسینی کۆرۆنا کە لەلایەن رێکخراوی تەندروستی جیهانییەوە پشتیوانی کراوە و پارەی بۆ کۆکراوەتەوە، لەلایەن کۆمپانیاکانی ئەسترازینیکا و زانکۆی ئۆکسفۆردەوە بەرهەمهاتووە، لەدوای گەیشتنی بە عێراق پشکی هەرێمی لێدەدرێت”.

وتیشی: لەو 16 ڤاکسینەی کە دەگاتە عێراق، بە دووجار لێدەدرێت، واتە بەشی هەشت ملیۆن کەس دەکات، هەرێمی کوردستانیش پشکی لەو ڤاکسینەدا 20%ەو بۆ ملیۆنێک و 250 هەزار کەس لە هەرێم دابین دەکرێت.

سەبارەت بە کاتی گەیشتنی ڤاکسینەکە وتی: لەدوای گەیشتنی بە عێڕاق، دوای رۆژێک پێدەچێت بگاتە هەولێر و دواتریش دەگاتە شارەکانی دیکەی هەرێم.

د.ڕەهێڵ وتیشی: لە رابردوودا لە گفتوگۆدابووین لەگەڵ سێ کۆمپانیای بەرهەمهێنانی ڤاکسین، بەڵام دواتر دڵنیاییمان پێدرا لەوەی عێراق پشکی هەرێم لە ڤاکسینەکان دەنێرێت، هەرێم لە ئێستادا هیچ گرێبەستێکی نییە بۆ ئەوەی راستەوخۆ ڤاکسینی کۆرۆنای بۆ رەوانەبکرێت.