“لە خۆپيشاندانەکانی ميانماردا 521 کەس کوژراوە”

SNN

ژمارەی ئەو کەسانەی لە خۆپیشاندانەکانی میانماردا لەلایەن هێزە ئەمنییەکانی ئەو وڵاتەوە کوژراون گەیشتە  521کەس.

کۆمەڵەی هاوکاریکردنی زیندانییە سیاسییەکان لە میانمار لە راپۆرتی رۆژانەیدا ئەوەی خستووەتەڕوو: “لە 24 کاتژمێری رابردوودا، 11 کەسی دیکە کوژراون و ژمارەی ئەو کەسانەی کە تا ئەمڕۆ لە ئاکامی توندوتیژی هێزە ئەمنییەکانی ئەو وڵاتە کوژراون گەیشتوەتە 521 کەس”.

راشيگەياند: “دوو هەزار و 608 کەس لەئێستادا دەستبەسەرن و 120 کەسی دیکەش بڕیاری دەستبەسەرکردنیان بۆ دەرکراوە”.

بەرەبەيانی يەکی شوبات سوپای ميانمار کودەتای سەربازی بەسەر حکومەتی ئەو وڵاتەدا کرد و باری نائاسای راگەياند، لەدوای کودەتاکەش سوپا ئونگ سان سووچی سەرۆکی پارتی بزوتنەوەی نیشتمانی دەسەڵاتدار و سەرجەم بەرپرسانی ئەو پارتەیان دەستگیرکرد، بەبیانوی ئەوەی ساختەکاريان لەدوایین هەڵبژاردنی پەرلەمانیدا کردووە.

لە رۆژی شەشی شوباتەوە هاووڵاتییانی میانمار بۆ گەڕاندنەوەی دیموکراسی خۆپیشاندانیان دەستپێکردووە و توندوتيژی و برينداری لیکەوتووەتەوە.