ناکۆکییەکانی نێوان تورکیا و ئیتالیا تەشەنە دەستێنێت
ئاڵای تورکیا و ئیتالیا
SNN
حکومەتی تورکیا گرێبەستێکی 70 ملیۆن یۆرۆیی بۆ کڕینی هێلیکۆپتەر لە کۆمپانیای لیۆناردۆی ئیتالی هەڵدەوەشێنێتەوە ئەویش دوای ناکۆکییەکی دپلۆماتیی نێوان ئەنقەرە و رۆما.
هەردوو رۆژنامەی La Repubblica و Fatto Quotidiano رۆژی یەکشەممە بڵاویانکردووەتەوە کە ئەو دوو وڵاتە پێشتر کێشەی دپلۆماتیی لەنێوانیاندا هەبووە.
ماریۆ دراگی رۆژی پێنچشەممەی رابردوو رەجەب تەیب ئەردۆگان سەرۆککۆماری تورکیای بە دیکتاتۆر وەسفکرد، ئەویش دوای ئەوەی لەکاتی پێشوازیکردن لە سەرۆکی کۆمسیارانی ئەوروپا کورسی بۆ دیاری نەکرا بوو.
دراگی وتی: “بە هیچ شێوەیەک حەزم بە هەڵسوکەوتی سەرۆکی تورکیا نییە، دوای ئەو لێدوانەش باڵیۆزی ئیتالیا لە ئەنقەرە بۆ گلەیی بانگهێشتکرا”.
رۆژنامەکانی ئیتالیا دەڵێن “لە ئێستادا تورکیا گرێبەستێکی 70 ملیۆن یۆرۆیی بۆ کڕینی هێلیکۆپتەر لەگەڵ ئیتالیا راگرتووە کە دەبوو چەند رۆژی رابردوو ئیمزا بکرایە”.
هاوکات چەند کۆمپانیایەکی دیکەی ئیتالیا هۆشدارییان پێدراوە لە هەڵوەشاندنەوەی چەند گرێبەستێک لەوانەی کۆمپانیای Ansaldo Energia کە بەنیازە ژمارەیەک وێستگەی گەورەی وزە لە تورکیا بنیات بنێت.
