روسیا: ئەمریکا باجی ئەو سەرکێشییانەی خۆی دەدات لەسەر دەستی ئێمە

SNN

ماریا زاخارۆفا وتەبێژی وەزارەتی دەرەوەی روسیا دەڵێت: “پێشتر ئەمریکامان ئاگادار کردووەتەوە لە ئەنجامی خراپی سزادانی روسیا”.

وتیشی: “ئەو سزایانە دەبنەهۆی ئەوەی ناکۆکییەکانی نێوانمان بەرەو خراپبوونی تەواو بچێت و هەر ئاکامێکی خراپ لەم کارەی ئەمریکا بکەوێتەوە، خەتاکەی دەچێتە ئەستۆی واشنتن”.

جۆو بایدن سەرۆکی ئەمریکا لەرێگەی ئیمزا کردنی مەرسومێکەوە سزای سەپاند بەسەر 32 دامەزراوە و کەسایەتیی رووسیدا کە دەستیان هەبووە لە نانەوەی پشێوی و دەستوەردان لە هەڵبژاردنەکان و هێرشی ئەلیکترۆنیدا.

بڕیاری سزاکەی ئەمریکا دوو تۆمەتی دیاریکردووە بۆ ئەوانەی سزای داون، گروپێک لە سزادراوان ئەوانەن کە گوایا دەستوەردانیانکردووە لە هەڵبژاردنەکانی ئەمریکادا و 16 کەسایەتی و 16 دامەزراوەن.

گرووپێکی دیکە کە سزاکە دەیانگرێتەوە و 5 کەسایەتی و 3 کۆمپانیان، باس لەوە دەکرێت کە دەستیان هەبووە لەو پشێوی و ئاژاوانەی بەمدواییانە لە دورگەی کریمیا لە ئۆکرانیا بەرپا بوون.

هاوکات و بەپێی بڕیارەکانی ئەمریکا، زیاتر لە 10 دپلۆماتکاری روسی کە لە واشنتنی پایتەختی ئەمریکا کریانکردووە، لەلایەن کۆشکی سپییەوە دەرکراون و دەبێت بگەڕێنەوە بۆ مۆسکۆ.

هەروەک حکومەتی ئەمریکا بەشێوەیەکی رەسمیی دەزگای هەواڵگریی روسیای تۆمەتبار کرد بەوەی دەستی هەبووە لە هێرشە ئەلیکترۆنییەکەی سەر کۆمپانیای SolarWinds ی ئەمریکی.