بەرپرسانی سعودیە و ئێران لە عێراق چاویان بەیەککەوتووە

SNN

رۆژنامەی فاینانشیاڵ تایمز بڵاویکردووەتەوە “بەرپرسانی باڵای عەرەبستانی سعودیە و ئێران دوای 4 ساڵ لە دابڕان، لەناو خاکی عێراق گفتوگۆی راستەوخۆیان کردووە”.

رۆژنامەکە دەشڵێت “گەڕی یەکەمی گفتوگۆکان لە رۆژی 9ی ئەم مانگە لە بەغدا بەڕێوەچووە و باسی هێرشی حوسییەکان کراوە بۆ سەر سعودیە و ئەنجامەکانیشی ئەرێنیی بوون”.

ئەم گفتوگۆیانەی نێوان ئێران ‌و سعودیە لەكاتێكدایە جۆ بایدنی سەرۆكی ئەمریكا بەمەبەستی ئارامكردنەوەی دۆخی ناوچەكە، هەوڵی زیندوكردنەوەی رێككەوتنی ئەتۆمی دەدات كە ساڵی 2015 لەنێوان ئێران ‌و وڵاتانی زلهێزدا ئیمزا كرا.

بەرپرسێکی باڵای سعودیە دەڵێت “گەر هەنگاوی لەم جۆرە بنرێت، دەبێتەهۆی بنیاتنانی متمانەیەکی تەواو بە ئاڕاستەی ئەمجامدانی گفتوگۆی بەرپرسانە تر بەبەشداریی زیاتری وڵاتانی کەنداو”.

هەندێک لە میدیا عێراقییەکان دەڵێن هەوڵەکانی سەرگرتنیی ئەم کۆبوونەوەیە مستەفا کازمی سەرۆکوەزیرانی عێراق لەپشتیەوەیەتی.

پێشتر سەرۆکوەزیرانی عێراق سەردانی هەریەک لە عەرەبستانی سعودیە و ئێران و ئەمریکاشی کردووە و دەوترێت چەند نامەیەکی لەنێوان ریاز و تاران و واشنتندا ئاڵوگۆڕ پێکردووە.